Shai Gilgeous-Alexander Nanguna sa Kadaugan sa Thunder Batok sa Cavaliers
Gipildi sa Oklahoma City Thunder ang Cleveland Cavaliers, 124-116, niadtong Miyerkules.
FIELD LEVEL MEDIA; Gihubad ni Alex Destor / Ato ni Bai
November 6, 2026 at 3:06:05 PM

Nobyembre 4, 2026; Oklahoma City, Oklahoma, USA; Nagpahiyom si Shai Gilgeous-Alexander (2) sa Oklahoma City Thunder human sa usa ka aksyon batok sa Cleveland Cavaliers atol sa ikaduhang katunga sa duwa sa Paycom Center.
Reuters / Alonzo Adams / Imagn Images
Gipildi sa Oklahoma City Thunder ang Cleveland Cavaliers, 124-116, niadtong Miyerkules.
Nakumpleto sa Thunder ang ilang duha ka sunod nga kadaugan batok sa Cavaliers sa tagsa-tagsa nilang home court, human modaog og lima ka puntos sa Cleveland niadtong Lunes.
Dili sama sa ilang unang panag-atbang, mas dako ang bentaha sa Thunder ning higayona, bisan og nakapaduol ang Cavaliers sa ilang puntos sa kataposang bahin sa duwa.
Nanguna ang Thunder gikan sa pagsugod hangtod sa kataposan sa duwa, ug nakaabot sa 25 puntos ang ilang labing dakong bentaha sa unang katunga.
Nakuha sa Oklahoma City ang kontrol sa duwa pinaagi sa 25-7 nga paglamang sa unang quarter, lakip ang walo ka puntos gikan sa bag-ong magdudula nga si Bennett Stirtz.
Sa tunga-tunga sa ikaduhang quarter, milabaw na ang Thunder sa 50-25.
Napakunhod sa Cleveland ngadto sa pito ka puntos ang ilang gilay-on sa unang mga minuto sa ikaduhang katunga, tungod sa pito ka sunodsunod nga puntos ni James Harden ug usa ka basket gikan kang Donovan Mitchell.
Apan human sa timeout sa Oklahoma City, gipakita ni Gilgeous-Alexander ang iyang kusog sa duwa.
Sa unang katunga, kasagaran nga mipuntos ang duha ka higayon nang nakadaog sa NBA Most Valuable Player award gikan sa gawas, diin pito sa iyang 12 ka tira gikan sa three-point line.
Nakapuntos si Gilgeous-Alexander pinaagi sa mid-range jumper aron mapahunong ang paghabol sa Cleveland. Gisundan niya kini og duha ka sunod nga assists sa mga basket duol sa ring, sa wala pa makapuntos pinaagi sa fadeaway jumper ug step-back three-pointer.
Wala na makapaduol ang Cavaliers og ubos sa walo ka puntos hangtod sa kataposang minuto. Nakapuntos si Gilgeous-Alexander og unom ka free throws sa kataposang 41 segundos aron mapadayon ang bentaha sa Thunder.
Nakapuntos si Gilgeous-Alexander og lima ka three-pointers, usa na lang ka three-pointer ang kulang aron matupong ang iyang personal nga rekord. Nakahimo siya og 11 ka basket sa 26 ka tira ug walo ka assists, ug usa na lang ka puntos ang kulang aron matupong ang iyang 43 puntos sa Cleveland niadtong Lunes.
Bisan wala gihapon ang tulo ka starters sa Thunder nga sila Jalen Williams, Chet Holmgren, ug Cason Wallace, nakabalik na ang importanteng reserbang magdudula nga si Alex Caruso human wala makaduwa sa tulo ka duwa tungod sa injury sa buolbuol.
Dako ang natabang sa depensa ni Caruso aron malimitahan sa Thunder ang Cavaliers sa 43% nga shooting accuracy, ang labing ubos sa Cleveland ning season.
Nakadugang si Ajay Mitchell og 23 puntos alang sa Oklahoma City, samtang nakatala si Stirtz og career-high nga 16 puntos.
Nanguna si Mitchell sa Cavaliers nga adunay 27 puntos gikan sa 10 ka nasulod nga tira sa 17 ka pagsulay, samtang nakatala si Harden og 19 puntos, siyam ka rebounds, ug unom ka assists. Nakahimo usab si Evan Mobley og 16 puntos ug 10 ka rebounds.
Sa hapit na matapos ang unang quarter, naangol ang tuong tuhod ni Jarrett Allen sa Cleveland human mabangga kang Jared McCain samtang naghimo og screen. Migawas si Allen sa duwa ug wala na makabalik. Wala siya makapuntos sulod sa pito ka minutos nga iyang nadulaan.
%20(100%20x%20100%20px).png)





