top of page
Bai (150 x 150 px) (100 x 100 px).png

Prince William Mibisita sa Bollywood Studio sa Mumbai

Mitan-aw si Britain's Prince William og mga sayaw sa Bollywood ug misuroy sa usa ka film studio sa Mumbai niadtong Miyerkules, sa kataposang adlaw sa iyang royal visit sa India, samtang ang iyang asawa nga si Kate Middleton nakighinabi sa mga health worker sa usa ka maternity hospital sa siyudad.

Shilpa Jamkhandikar; Gihubad ni Herli Mae Virador / Ato ni Bai

November 19, 2026 at 9:18:22 AM

Prince William, Prince of Wales, nga nakig-istorya sa grupo sa mga tawo nga nagsul-ob og tradisyonal nga sinina samtang nagtambong sa usa ka kalihokan.

Nakigsulti si Prince William, Prince of Wales, sa mga performer sa Dharma Productions, usa sa mga nangunang film production company sa India nga hapit nang magsaulog sa ika-50 nga anibersaryo niini, samtang gipasiugda ang kahinungdanon sa pelikula, telebisyon, fashion ug uban pang creative industries sa Mumbai, India, Nobyembre 18, 2026.

Chris Jackson / Pool pinaagi sa REUTERS

Mitan-aw si Britain's Prince William og mga sayaw sa Bollywood ug misuroy sa usa ka film studio sa Mumbai niadtong Miyerkules, sa kataposang adlaw sa iyang royal visit sa India, samtang ang iyang asawa nga si Kate Middleton nakighinabi sa mga health worker sa usa ka maternity hospital sa siyudad.


Tapuson sa royal couple, nga anaa sa tulo ka adlaw nga pagbisita sa Mumbai, ang ilang biyahe sa New Delhi ug makigtagbo kang Prime Minister Narendra Modi sa ulahing bahin sa Miyerkules.


Adunay managlahing kalihokan sila William ug Kate niadtong Miyerkules. Mibisita ang prinsipe sa opisina sa iladong Bollywood production house nga Dharma Productions sa gawas sa sentro sa Mumbai, samtang si Kate mibisita sa usa ka maternity hospital sa sentro sa siyudad.


Mipahiyom ug mipakpak si William samtang misayaw ang mga mananayaw sa usa ka kanta gikan sa sikat nga Bollywood movie sa Dharma nga "Kabhi Khushi Kabhie Gham" (Joy Sometimes, Sorrow Sometimes), nga ang pipila ka eksena nahitabo sa London. Mitambong usab ang mga aktor nga sila Saif Ali Khan ug Kareena Kapoor.


"He was gracious and kind and spoke extensively about the potential of Indian cinema and how cinema across all Indian languages is loved worldwide," matod sa filmmaker nga si Karan Johar, nga nagdumala sa Dharma Productions, human sa pagbisita.


Sukad niadtong Lunes, naglibot ang royal couple sa siyudad nga adunay 13 ka milyon nga populasyon. Lakip sa ilang mga kalihokan ang pagdula og cricket uban sa retiradong si Sachin Tendulkar, pagbisita sa usa ka eskwelahan sa paghimo og mga handicraft, ug pagtambong sa engrandeng seremonya sa Earthshot Prize, usa ka pasidungog nga may kalabotan sa climate change nga gitukod ni William unom ka tuig na ang milabay.


Mitunol usab og usa sa mga pasidungog ang Princess of Wales niadtong Martes sa gabii samtang nagsul-ob og hayag nga pula nga Indian-style gown. Kini ang iyang labing inila nga pagbisita sa gawas sa nasod sukad siya nagpatambal sa kanser niadtong 2024.


Sa iyang pakigpulong atol sa seremonya sa pasidungog niadtong Martes, miingon si William nga nagkaklaro na ang epekto sa global warming tungod sa balikbalik nga grabeng kainit ug makagun-ob nga mga baha. Gihulagway niya kini nga usa ka kritikal nga panahon alang sa kalibotan.


-Shilpa Jamkhandikar; Gihubad ni Herli Mae Virador / Ato ni Bai

bottom of page