NBA: Warriors, nakakuha og ikapitong sunodsunod nga kadaugan batok sa Magic
Gipangulohan ni Stephen Curry ang Golden State Warriors sa ilang 126-119 nga kadaugan batok sa Orlando Magic human sa overtime niadtong Sabado sa gabii sa San Francisco. Nakatala si Curry og 41 puntos, lakip ang importanteng three-point play sa dihang 1 minuto ug 38 segundos na lang ang nahibilin sa overtime, nga nakahatag sa Warriors og bentaha nga wala na mabawi sa Magic. Paglabay sa 44 segundos, nakasulod na usab siya og tira aron makompleto ang iyang 41 puntos.
FIELD LEVEL MEDIA / Reuters / Paraluman News; Gihubad ni Herli Mae Virador / Ato Ni Bai
November 8, 2026 at 10:30:14 AM

Nobyembre 7, 2026; San Francisco, California, USA; Mikaway sa mga fans si Golden State Warriors coach Bruce Fraser (wala) ug guard Stephen Curry (30) human sa ilang kadaugan batok sa Orlando Magic sa overtime sa Chase Center.
Reuters / D. Ross Cameron / Imagn Images
Gipangulohan ni Stephen Curry ang Golden State Warriors sa ilang 126-119 nga kadaugan batok sa Orlando Magic human sa overtime niadtong Sabado sa gabii sa San Francisco. Nakatala si Curry og 41 puntos, lakip ang importanteng three-point play sa dihang 1 minuto ug 38 segundos na lang ang nahibilin sa overtime, nga nakahatag sa Warriors og bentaha nga wala na mabawi sa Magic. Paglabay sa 44 segundos, nakasulod na usab siya og tira aron makompleto ang iyang 41 puntos.
Nakauna ang Orlando, 118-117, human makasulod si Tristan da Silva og three-pointer, nga ika-18 sa Magic sa maong duwa, sa dihang 2 minutos ug 24 segundos na lang ang nahibilin sa overtime. Human mapakyas ang duha ka team sa ilang sunod nga mga tira, nakasulod si Curry og floater gikan sa walo ka pye ug nakakuha og foul gikan kang Wendell Carter Jr.
Nasulod usab niya ang free throw aron makalamang ang Golden State og duha ka puntos.
Wala masulod ni Carter ang duha ka free throw nga unta makapatas sa duwa. Human niini, nakasulod na usab si Curry og susamang tira, apan niining higayona walay foul, nga naghatag sa Warriors og 122-118 nga bentaha.
Nakatala si Yaxel Lendeborg og 23 puntos, walo ka rebounds, ug tulo ka blocks, lakip ang usa ka dunk ug duha ka free throw sa kataposang bahin sa duwa aron masiguro ang pito ka puntos nga kadaugan. Kini ang ikapitong sunodsunod nga kadaugan sa Warriors bisan pa og nalabwan sila sa Magic sa offensive rebounds, 24-3, ug sa mga puntos gikan sa turnovers, 26-10.
Kini ang ikaduhang higayon karong season nga nakakuha si Curry og 40 o labaw pang puntos. Ika-16 na usab kini niyang duwa nga nakatala og labing menos 40 puntos sukad nag-edad siya og 35, nga nakapalabaw kaniya kang LeBron James alang sa pinakadaghang ingon niini nga duwa sa kasaysayan sa NBA.
Midugang si Brandin Podziemski og 15 puntos ug si Georges Niang og 11 puntos alang sa Warriors. Si Draymond Green usab ang nanguna sa assists sa maong duwa nga adunay 13, uban ang unom ka rebounds, duha ka steals, ug duha ka blocks, bisan duha lamang ka puntos ang iyang nakuha.
Nanguna si Franz Wagner sa Orlando nga adunay 30 puntos, lakip ang tulo ka three-pointer. Nakasulod ang Magic og 18 ka three-pointer sa duwa, diin lima niini gikan kang da Silva nga nakatala og 19 puntos. Si Carter usab nakasulod og tulo ka three-pointer ug nakakuha og double-double nga 19 puntos ug 11 ka rebounds, diin unom niini ang offensive rebounds.
Nakatala usab si Wagner og double-double nga adunay 11 ka assists. Samtang sila si Jamal Cain, nga nakakuha usab og 12 ka rebounds, ug Anthony Black nakatala og tag-18 puntos. Wala makadula ang ilang mga kauban nga sila si Desmond Bane tungod sa sakit, Paolo Banchero tungod sa pagka-sprain sa tuong buolbuol, Jonathan Isaac tungod sa pag-atiman sa iyang wala nga tuhod, ug Jalen Suggs tungod sa bun-og sa tuong tuhod.
Kini ang ikaupat nga sunodsunod nga kapildihan sa Orlando.
Nakahimo ang Warriors og 16 puntos nga bentaha sa pagtapos sa first half, apan naabot gihapon sa overtime ang duwa human makakuha ang Orlando og 37 puntos sa third quarter. Nakasulod usab si Cain og tip-in sa dihang 1.5 segundos na lang ang nahibilin sa regular nga oras, nga maoy ika-12 nga higayon nga nagtabla ang duha ka team sa fourth quarter.
-
%20(100%20x%20100%20px).png)





