NBA: Oklahoma City Thunder, gidaog ang Washington Wizards, 114-75
Mitala si Shai Gilgeous-Alexander og 30 puntos aron tabangan ang Oklahoma City Thunder nga makuha ang ilang ikaupat nga sunodsunod nga kadaugan human pildihon ang bisitang Washington Wizards, 114-75, niadtong Sabado.
FIELD LEVEL MEDIA / Reuters / Paraluman News; Gihubad ni Herli Mae Virador / Ato Ni Bai
November 8, 2026 at 7:43:42 AM

Nobyembre 7, 2026; Oklahoma City, Oklahoma, USA; Nag-ilog sa bola si Washington Wizards forward Kyshawn George (18) ug Oklahoma City Thunder guard Shai Gilgeous-Alexander (2) atol sa unang katunga sa duwa sa Paycom Center.
Reuters / Alonzo Adams / Imagn Images
Mitala si Shai Gilgeous-Alexander og 30 puntos aron tabangan ang Oklahoma City Thunder nga makuha ang ilang ikaupat nga sunodsunod nga kadaugan human pildihon ang bisitang Washington Wizards, 114-75, niadtong Sabado.
Nakapildi ang Wizards sa ilang kataposang tulo ka sunodsunod nga duwa ug lima sa ilang kataposang pito ka duwa.
Ang 75 puntos sa Washington mao ang labing ubos nilang nakuha sa usa ka duwa sukad sa 2017-18 season.
Sa ikaduhang higayon sulod sa duha ka adlaw, wala na kinahanglana nga modula si Gilgeous-Alexander sa tibuok fourth quarter tungod kay nakab-ot na sa Thunder ang dakong bentaha sa wala pa magsugod ang kataposang 12 minutos sa duwa.
Aduna na karoy rekord nga lima ka kadaugan ug duha ka kapildihan ang Oklahoma City sukad nakaangkon og mga injury nga nagkinahanglan og taas nga panahon sa pag-ayo ang ilang mga starter nga sila si Chet Holmgren, Jalen Williams, ug Cason Wallace sa samang duwa niadtong Oktubre 25.
Nanguna ang lig-on nga depensa sa Thunder sa tibuok duwa, nga nagpugong sa Washington nga makakuha og 30% nga shooting accuracy gikan sa field.
Ang 29.6% nga shooting accuracy sa Washington mao ang ilang labing ubos sukad Disyembre 2017.
Nagsugod pagkontrolar sa duwa ang Oklahoma City sa ulahing bahin sa first quarter, diin nakahimo sila og 10-3 run aron mabali ang ilang 16-15 nga pagkahabilin ngadto sa 25-19 nga bentaha.
Nakapuntos si Gilgeous-Alexander pinaagi sa step-back jumper ug gisundan kini og layup aron sugdan ang maong run.
Padayong gipadako sa Thunder ang ilang bentaha sa sayong bahin sa second quarter pinaagi sa 16-4 nga paglamang sa puntos, nga naghatag kanila og 18 puntos nga bentaha bisan naa sa bench si Gilgeous-Alexander.
Naghiusa sila si Ajay Mitchell ug Jared McCain sa pagkuha sa unang 16 puntos sa Oklahoma City sa second quarter.
Sa ulahing bahin sa second quarter, migawas sa duwa si DeAndre Ayton sa Washington tungod sa injury sa ubos nga bahin sa iyang bitiis ug wala na makabalik.
Sa sayong bahin sa third quarter, nakapakunhod ang Wizards sa ilang pagkahabilin ngadto sa 14 puntos samtang naningkamot nga makabalik sa duwa. Apan dali nga nakahimo ang Thunder og 10-2 run, lakip ang unom ka puntos gikan kang Gilgeous-Alexander, nga nakapasiguro sa ilang kadaugan.
Mitapos si McCain og 19 puntos gikan sa bench, samtang nakakuha si Isaiah Hartenstein og 14 ka rebounds.
Ang rookie nga si Aday Mara, nga ikaduha pa lang kini nga higayon nga nahimong starter, mitapos og season-high nga 18 puntos gikan sa walo ka nasulod nga tira sa 10 ka pagsulay, uban ang walo ka rebounds.
Nanguna si AJ Dybantsa sa Washington nga adunay 19 puntos. Si Trae Young, nga midula sa unang higayon sa iyang home state sukad gibalhin siya sa Wizards niadtong miaging season, nakakuha lamang og upat ka puntos gikan sa usa ka nasulod nga tira sa unom ka pagsulay.
Wala makadula si Anthony Davis, nga nanguna sa Washington sa average nga 23.4 puntos matag duwa, tungod sa injury sa iyang ankle.
Kini ang ikasiyam nga sunodsunod nga kadaugan sa Thunder batok sa Wizards.
-FIELD LEVEL MEDIA / Reuters / Paraluman News; Gihubad ni Herli Mae Virador / Ato Ni Bai
%20(100%20x%20100%20px).png)





