Hong Kong Open: Alex Eala, napildi ni Claire Liu sa finals
Napildi ang Filipina tennis star nga si Alexandra Eala batok sa Amerikanang si Claire Liu, 3-6, 0-6, sa finals sa WTA 250 Prudential Hong Kong Open niadtong Domingo sa outdoor hardcourt sa Victoria Park Tennis Stadium, nga nakapugong kaniya sa pagdaog og laing titulo.
Paraluman News; Gihubad ni Herli Mae Virador / Ato Ni Bai
November 8, 2026 at 12:39:39 PM

Nobyembre 5, 2026, Hong Kong, China: Si Alexandra Eala atol sa iyang duwa batok kang Tereza Valentova sa round of 16 sa Prudential Hong Kong Tennis Open sa Victoria Park.
Elson Li / South China Morning
Napildi ang Filipina tennis star nga si Alexandra Eala batok sa Amerikanang si Claire Liu, 3-6, 0-6, sa finals sa WTA 250 Prudential Hong Kong Open niadtong Domingo sa outdoor hardcourt sa Victoria Park Tennis Stadium, nga nakapugong kaniya sa pagdaog og laing titulo.
Gipakita sa 26-anyos nga si Liu, nga taga-Thousand Oaks, California, ang iyang kusog nga pagdula ug gikinahanglan lamang og usa ka oras ug 33 minutos aron makuha ang titulo. Wala siya mapildi bisan usa ka set sa tibuok torneyo. Kini ang iyang ikaduhang titulo karong season human midaog sa WTA 125 Kia Open sa Barranquilla, Colombia, niadtong Septiyembre 12.
Nakaabot si Liu sa finals batok sa World No. 17 nga si Eala human sa sunodsunod nga kadaugan sa duha lamang ka set batok nila Tatiana Prozorova (6-2, 6-4), eighth seed Katie Boulter (7-5, 6-4), Zeynep Sonmez (6-1, 6-4), ug Alexandra Shubladze (7-5, 6-4).
Si Liu, nga nanguna sa ITF junior rankings niadtong 2017, adunay daghang kalampusan sa junior tennis. Lakip niini ang iyang pagdaog sa 2017 Wimbledon girls’ singles title, pagkahimong runner-up sa Roland Garros, ug pagdaog sa 2016 Wimbledon girls’ doubles title kauban ang iyang isigka-Amerikanang si Usue Maitane Arconada.
Alang sa 21-anyos nga si Eala, ang iyang pagkahimong runner-up sa Hong Kong maoy pagtapos sa sunodsunod nga mga torneyo sa Asia. Miabot siya sa Hong Kong human mapildi sa quarterfinals sa WTA 500 Pan Pacific Open sa Tokyo, Japan, batok sa Russian nga si Diana Shnaider, 6-2, 6-7(5), 4-6. Gipildi usab ni Shnaider si Eala sa round of 16 sa WTA 500 Ningbo Open usa ka semana sa wala pa kini.
Human makadaog og bronze medal sa singles sa Nagoya Asian Games, sayo usab nga natangtang si Eala sa mga torneyo sa Wuhan ug Singapore. Sa Wuhan, napildi siya sa Chinese qualifier nga si Shi Han sa tulo ka set, samtang sa Singapore, napildi siya sa unang round batok sa World No. 180 nga si Prozorova.
Bisan pa sa iyang kapildihan sa Hong Kong, nagpadayon si Eala sa paghimo og kasaysayan sa iyang tennis career. Niadtong Septiyembre 7, 2025, nahimo siyang unang Pilipino nga nakadaog og titulo sa usa ka WTA-level tournament human niya mapildi ang Hungarian nga si Panna Udvardy, 1-6, 7-5, 6-3, sa finals sa Guadalajara 125 Open sa Mexico.
Sa umaabot, gikatakdang modula si Eala sa usa ka exhibition match batok sa Indonesian tennis player nga si Janice Tjen sa Disyembre 8 sa Philippine Arena sa Bocaue, Bulacan, aron makahatag og higayon sa mga lokal nga fans nga makakita sa iyang pagdula.
-Paraluman News; Gihubad ni Herli Mae Virador / Ato Ni Bai
%20(100%20x%20100%20px).png)





