Pilipinas Mo-host sa East Asia Baseball Cup Karong Disyembre

Mo-host ang Pilipinas sa East Asia Cup sa Disyembre 7 hangtod 13 sa Rizal Memorial Baseball Stadium sa Malate, Manila.

Magtigom sa kaulohan ang unom ka nasod, lakip ang Pilipinas, Singapore, Hong Kong, ug Thailand, alang sa maong torneyo nga gilaumang makapalig-on sa kompetisyon sa baseball ug sports tourism sa makasaysayang estadyum.

Sa unang higayon sukad giablihan niadtong 1934, giagian og dakong pag-ayo ang Rizal Memorial Baseball Stadium (RMBS) aron mapasig-uli ang kanhing kahalangdon niini ug mapataas ang kalidad sa baseball sa Pilipinas ngadto sa internasyonal nga mga sumbanan.

“Our objective is to finish the facelift as soon as possible and bring the stadium to global standards,” matod ni Philippine Sports Commission (PSC) Chair John Patrick Gregorio sa usa ka pahayag niadtong Lunes.

Matod niya, ayohon ug palig-onon ang grandstand aron makalingkod ang 10,000 ka tumatan-aw. Magbutang usab og digital scoreboard sa makasaysayang bungbong sa outfield ug artificial turf nga magamit sa bisan unsang panahon ug mosunod sa internasyonal nga mga sumbanan.

“This is about giving Filipino baseball a true home worthy of its history and future,” dugang ni Gregorio.

Ang Philippine Amateur Baseball Association (PABA) maoy nag-organisar sa torneyo, nga opisyal nga giila sa Baseball Federation of Asia (BFA).

“This renovation is a turning point for Philippine baseball. Hosting the East Asia Cup in a world-class stadium will inspire our athletes and show the region that we are serious about competing at the highest level," matod ni PABA secretary general Mike Asuncion.

Dugang niya, dili lamang kutob sa RMBS ang panagtambayayong sa PSC ug PABA, tungod kay adunay plano nga magtukod og dugang mga baseball field sa tibuok nasod aron mapalambo ang talento sa mga batan-ong magdudula ug mapalapad ang mga programa sa baseball sa mga komunidad.

Giisip ang RMBS nga usa ka makasaysayang lugar sa baseball sa kalibotan. Sa unang exhibition game niini niadtong Disyembre 1934, si Lou Gehrig ang nakahimo sa unang home run sa estadyum, nga gisundan sa ikaduhang home run ni Babe Ruth. Ang ilang mga nahimo nakarekord gihapon sa mga bungbong sa estadyum isip pahinumdom sa papel sa Manila sa kasaysayan sa baseball.

Mosalmot sa East Asia Cup nga adunay dakong pagsalig ang Hataw Pilipinas, ang opisyal nga ngalan sa 24 ka miyembro sa Philippine national team nga nakadaog og gold medal sa Southeast Asian Games batok sa host nga Thailand.

Manguna sa koponan si team captain ug pitcher Romeo Jasmin, nga hapit nang motugyan sa iyang papel ngadto sa sunod nga henerasyon sa mga Filipino baseball player, samtang determinado siyang ipakita nga andam na ang baseball sa Pilipinas nga mopataas sa lebel sa ilang pagduwa.

Kabahin usab sa mga nag-unang magdudula sa koponan ang mga beterano nga sila Ferdinand “Bong” Liguayan Jr., catcher Mark Steven Manaig, leadoff hitter Jenald Pareja, ug ang nag-uswag nga magdudula nga si Mark Beronilla.

Mogiya sa koponan ang eksperyensiyadong mga coach nga sila head coach Lando Binarao, batting coach Ricardo “Iking” Jimenez, kansang ngalan nakarekord sa bungbong sa estadyum, ug kanhi pitcher Joseph Orillana.

Gawas sa mga duwa sa baseball, gilauman usab nga makapalig-on sa sports tourism ang East Asia Cup pinaagi sa pagdani sa mga fans ug delegasyon gikan sa nagkalain-laing bahin sa Asia.

Tungod kay moabot ang mga koponan duha ka adlaw sa dili pa magsugod ang torneyo ug adunay umpire clinic nga gikatakda sa Disyembre 3 hangtod 5, adunay kahigayonan ang Manila nga ipakita dili lamang ang iyang kasaysayan sa baseball kondili usab ang pagkamaabiabihon ug buhong nga kultura niini.

-Ato ni Bai