Pilipinas, European Union nagkab-ot og free trade deal

Nagkab-ot ang European Union ug Pilipinas sa inisyal nga free trade agreement isip kabahin sa mas lapad nga pagpokus sa bloc sa Asia, matod ni Commissioner for Trade and Economic Security Maros Sefcovic niadtong Martes.

"The key parameters are there, they are approved by the political level and now what it means is that we have to translate these numbers, these key agreements into the legal text," matod ni Sefcovic sa reporters.

Ang inisyal nga "substantial agreement" gilaum nga mosangpot sa usa ka hingpit nga kasabutan sulod sa umaabot nga mga bulan, matod sa European Commission.

Nahimo ang kasabutan sa Pilipinas samtang mas gipunting sa EU ang Asia, ilabina ang Southeast Asia, aron mangita og bag-ong merkado alang sa mga produkto ug serbisyo niini ug mga lugar nga kapamuhian, isip paningkamot nga maminusan ang epekto sa tariffs ni US President Donald Trump.

Nakab-ot na sa EU ang trade agreements uban sa Vietnam ug Indonesia ug nakig-negosasyon usab kini sa Malaysia ug Thailand, diin ang negosasyon sa Thailand maoy pinakaabante, sumala ni Sefcovic.

Pinaagi sa kasabutan sa Pilipinas, tangtangon ang kapin sa 94% sa tariffs sa duha ka kilid, nga makabenepisyo sa EU industrial exports sama sa machinery, appliances ug transport equipment, ingon man sa agrifood exports sama sa meat, dairy ug spirits.

Aduna pay dakong posibilidad nga motubo ang bilateral trade labaw sa €17.6 billion nga kantidad sa mga produkto ug €10.3 billion sa mga serbisyo, matod sa EU Commission.

($1 = 0.8725 euros)

-Ato ni Bai