PH nagsugod pag-ila sa mga biktima sa ferry fire, kapin 50 ang wala pa makit-i

Gisugdan sa mga awtoridad sa Pilipinas niadtong Sabado ang mabinantayong proseso sa pag-ila sa mga biktima sa sunog sa ferry, usa ka adlaw human nakuha sa mga responder ang mga lawas gikan sa nasunog nga barko. Misaka sa labing menos 35 ang namatay, samtang kapin sa 50 ka tawo ang wala pa makit-i.

Gidala ang mga lawas ngadto sa pantalan sa lungsod sa Coron, diin gitukod ang temporaryong mga tolda aron masusi ug mailhan sa forensic teams ang mga biktima.

Duol sa pantalan, nabalaka nga nagtan-aw ang pipila ka mga sakop sa pamilya samtang gidala sa mga responder nga nagsul-ob og protective suits ang itom nga body bags gikan sa Coast Guard vessel ngadto sa temporaryong mga tolda.

Usa kanila si Anelyn Magbanua, 37, kansang bana pabalik sa Coron human mibisita sa ilang mga anak sa Manila sa dihang nasunog ang ferry. Kapin sa 130 ka tawo ang sakay sa barko, nga hapit na unta mahuman sa kapin 20 ka oras nga biyahe sa dihang miulbo ang sunog.

"I hope he is not among the dead being brought off the ship. I hope he is alive and has only drifted to another island," matod niya.

"It will be very difficult to accept if he's really gone," matod niya. "He loved his children very much."

Unang nakasulod ang mga bombero sa ferry niadtong Biyernes human mapalong ang sunog, kapin usa ka adlaw sukad kini miulbo. Tungod niini, naabot sa mga awtoridad ang mga bahin sa barko nga lisod sudlon tungod sa baga nga aso ug grabeng kainit. Matod sa Coast Guard, nakit-an ang mga nasunog nga salin sa lawas sa economy accommodation section sa ferry.

Gipakita sa mga hulagway nga gipagawas sa Coast Guard ang grabeng kadaot sa sulod sa barko, diin ang mga han-ay sa steel bed frames nangapiko tungod sa grabeng kainit ug natabonan sa abo. Sa pipila ka hulagway, makita ang daw mga kalabera taliwala sa mga naguba nga bahin sa barko.

Gipahayag ni Philippine Coast Guard official Geronimo Tuvilla sa press conference niadtong Sabado nga prayoridad karon ang pag-ila sa mga biktima ug pagtino sa hinungdan sa sunog.

Base sa gisulti sa mga naluwas, duha ka pagbuto ang nadungog sa sulod sa barko sa wala pa miulbo ang sunog, matod sa Maritime Industry Authority.

Usa ka survivor nga giinterbyu sa GMA News ang nakahinumdom nga nakakita una siya og gamay nga aso nga dali rang nahimong dakong kalayo ug mikaylap sa tibuok ferry sulod lamang sa pipila ka segundo.

Wala pa usab maklaro ang kahimtang sa kapitan sa barko. Gipahayag ni Coast Guard spokesperson Commodore Noemie Cayabyab sa maong press conference nga nakadawat siya og impormasyon nga buhi ang kapitan, apan wala ang iyang ngalan sa listahan sa 43 ka kumpirmadong naluwas.

Ang sunog mao ang pinakabag-o sa sunod-sunod nga makamatay nga maritime accidents sa Pilipinas, nga adunay kapin sa 7,600 ka isla ug diin milyon-milyong tawo ang nagsalig sa mga ferry ug gagmayng sakayan sa pagbiyahe tali sa mga probinsya ug isla.

-Ato ni Bai