PH isip ASEAN chair nagpahayag og kabalaka sa mga namatay sa Myanmar airstrike

Nagpahayag og kabalaka ang Pilipinas, isip chair sa Association of Southeast Asian Nations (ASEAN), sa airstrike sa Rakhine state sa Myanmar nga miresulta sa mga namatay, nasamdan, ug pagkaguba, ug andam kini nga mopahigayon og mga panaghisgot sulod sa regional bloc kon unsaon labing maayong pagtabang sa Myanmar.

"The Philippines is closely monitoring developments and expresses concern over the attacks which resulted in destruction, loss of lives and injuries to those affected," matod ni Foreign Affairs Assistant Secretary for ASEAN Affairs Ana Marie Hernando sa usa ka email response niadtong Sabado.

Isip ASEAN chair, matod sa Manila, padayon nitong gikonsiderar ang mga panglantaw sa tanang member states ug magpadayon nga mosunod sa consensus-based approach sa regional bloc.

Gipahayag sa Pilipinas nga andam kini nga mopahigayon og mga panaghisgot sulod sa ASEAN bahin sa mga paagi sa pagtabang sa Myanmar, subay sa komon nga tinguha nga makapangita og solusyon nga "Myanmar-owned and led."

Ang Kyauktaw airstrike niadtong Lunes, ang pinakagrabeng pag-atake sa Rakhine sukad sa pagpamomba sa usa ka ospital niadtong Disyembre, nakapatay og 50 ka tawo ug nakasamad sa daghan pa.

Naipit ang Myanmar sa nationwide civil war sukad sa 2021 coup, diin nakig-away batok sa militar ang alyansa sa mga armadong grupo, lakip ang Arakan Army.

Sukad niadto, ang dugay nang panagbangi nakapatay og mga 100,000 ka tawo ug nakapabalhin og kapin sa 3.5 milyon gikan sa ilang mga pinuy-anan sa kabos nga Southeast Asian nation.

-Ato ni Bai