Mga nangunang AI company nagpahimangno sa UN Security Council sa peligro sa AI sa katawhan

Nagpahimangno ang mga nangunang artificial intelligence (AI) company sa kalibotan ngadto sa United Nations Security Council niadtong Miyerkules bahin sa mga peligro nga mahimong dala sa AI sa katawhan. Giawhag usab nila ang mga gobyerno nga magtinabangay sa pagdumala sa nagkadako nga kapabilidad sa maong teknolohiya.

Gipahayag ni Anthropic CEO Dario Amodei ngadto sa 15 ka miyembro sa Security Council, nga responsable sa pagmintinar sa internasyonal nga kalinaw ug seguridad, nga kon dili maayong madumala ang AI, nagtuo siya nga "AI could be a risk to humanity as a whole."

Gipahigayon ang miting sa pagpanguna sa France atol sa tinuig nga UN General Assembly, diin nagtigom ang mga lider sa kalibotan. Nahitabo kini taliwala sa mga pahimangno nga ang AI systems posibleng makahimo na sa pagpalambo sa kaugalingon niini ug mahimong dili na makontrol sa tawo.

"For all the differences of the people in this room, we must put aside those differences in order to confront this global opportunity and global threat that is being presented to us at the same time. No leader, no company and no nation can manage this alone," matod ni Amodei.

Naglisod ang mga gobyerno sa tibuok kalibotan sa pagsabay sa paspas nga pag-uswag sa artificial intelligence. Nagkalahi usab ang pamaagi sa United States ug China, ang duha ka nangunang nasod sa pagpalambo sa AI, bahin sa pagdumala sa maong teknolohiya.

Gipahayag ni President Donald Trump nga dili kinahanglan sa US ang bag-ong mga regulasyon nga espesipiko alang sa AI. Sa laing bahin, nagpatuman ang China og mga lagda sa AI algorithms ug training data, lakip ang obligasyon nga klarong markahan ang mga content nga gihimo gamit ang AI.

Gipasiugda ni Hugging Face co-founder Clément Delangue ang papel sa AI tools sa pagpanalipod batok sa cyberattacks. Gihisgotan niya ang usa ka insidente diin nakasulod sa imprastraktura sa Hugging Face ang AI agents sa US company nga OpenAI human makagawas sa ilang testing environment.

"We were attacked by AI, but more importantly, we defended ourselves with AI," matod niya sa Security Council.

Gilaoman usab nga mopahayag ang mga miyembro sa Security Council, lakip ang United States ug China, nga nag-unhanay sa pagpalambo sa AI.

Matod ni Delangue, migamit ang Hugging Face og Chinese AI model aron makatabang sa pagpanalipod batok sa pag-atake sa AI agents sa OpenAI tungod kay mas gamay kini og mga restriksyon kon itandi sa susamang AI tools gikan sa US. Gipakita sa iyang mga pahayag ang nagkadako nga presensya sa Chinese AI products, nga nakadani og mga tiggamit sa tibuok kalibotan tungod usab sa mas barato nilang mga alternatibo kon itandi sa American AI models.

Gipahayag ni OpenAI CEO Sam Altman nga gikinahanglan ang internasyonal nga kooperasyon.

“If AI is to be democratic, the most important decisions cannot be made by labs in San Francisco alone. They must be shaped through democratic processes and by governments accountable to the people they serve," matod ni Altman sa Security Council.

Samtang nagpadayon ang miting sa Security Council, gipahayag ni Australian Prime Minister Anthony Albanese ngadto sa mga tigbalita sa New York nga usa ka AI agent nga gihimo sa OpenAI ang nakasulod sa website sa gobyerno sa Australia niadtong Hunyo ug naka-access sa mga pampubliko ug dili pampublikong file.

US NGADTO SA UN: DILI NINYO MADUMALA ANG TEKNOLOHIYA NGA WALA NINYO MASABTI

Nagpahimangno si Yoshua Bengio, usa ka Canadian nga giila nga usa sa mga "Godfathers of AI" ug co-chair sa Independent International Scientific Panel nga gitukod sa UN General Assembly niadtong miaging tuig, ngadto sa Security Council nga "The dangers are real and imminent."

"This council faces an unprecedented threat, one that none of its members would choose, that none can contain alone, and that does not respect the borders we defend," matod niya.

Gipahayag ni Trump ngadto sa mga lider sa kalibotan atol sa UN General Assembly niadtong Martes nga siya "rejects any attempt to construct a globalist scheme to control" AI. Gihulagway niya ang teknolohiya nga talagsaon, apan gipasiugda nga mag-amping ang US.

Gisuportahan ni White House science and technology adviser Michael Kratsios ang posisyon ni Trump atol sa iyang pagpahayag sa UN Security Council niadtong Miyerkules.

"You cannot govern technology you do not understand. This body and others like it should focus on sharing best practices to build domestic capacity, not establishing a global regulatory scheme," matod niya.

Gipahayag ni China's UN Ambassador Fu Cong nga gikinahanglan ang padayong pagpalambo sa mga regulasyon, pagpalig-on sa pagtubag sa mga emerhensiya ug kooperasyon sa mga nasod bahin sa AI.

"It is incumbent upon the international community to work more closely together, attach equal importance to development and security, and steer AI development for the positive, for good, and for humanity," matod niya sa Security Council.

Dugay nang nanawagan si UN Secretary-General Antonio Guterres alang sa global nga pagdumala sa AI. Nagpahimangno usab siya nga dili angay ibaliwala ang mga peligro nga dala sa paspas nga pag-uswag sa artificial intelligence, nga sukwahi sa posisyon ni Trump.

Una nga nagpahigayon og miting ang Security Council bahin sa mga peligro sa AI niadtong 2023. Niadtong panahona, gipahayag sa China nga dili angay mahimong "runaway horse" ang maong teknolohiya, samtang nagpahimangno ang United States batok sa paggamit niini sa pagsensor o pagsumpo sa mga tawo. Niadtong 2024, si kanhi US Secretary of State Antony Blinken ang nangulo sa usa ka miting sa Security Council bahin sa AI.

-Ato ni Bai