Mga gobyerno sa kalibotan layo pa sa pagkab-ot sa UN biodiversity targets, matod sa pagtuon

Gipakita sa usa ka pagtuon nga gipagawas niadtong Miyerkules nga layo pa sa pagkab-ot sa mga gobyerno sa tibuok kalibotan ang dakong target sa United Nations (UN) nga mapanalipdan ug mapreserbar ang labing menos 30% sa kayutaan ug kadagatan sa kalibotan hangtod 2030.

Isip kabahin sa Kunming-Montreal Global Biodiversity Framework nga gikasabotan sa kataposang bahin sa 2022, dul-an sa 200 ka nasod ang miuyon sa "30 by 30" nga tumong ug misaad nga magtigom og labing menos $200 billion kada tuig aron mabalik ang biodiversity nga padayong nawala sulod sa daghang dekada.

Apan bisan nadugangan og 1.3 million square kilometers ang kayutaan ug 6 million square kilometers ang kadagatan nga opisyal nang gipanalipdan sukad nagsugod ang kasabotan, 20% pa lamang sa kayutaan ug 10% sa kadagatan ang nasakop sa proteksyon, sumala sa pagtuon sa pipila ka environmental groups nga gipangulohan sa US-based Campaign for Nature.

Ang resulta sa pagtuon nahiuyon sa opisyal nga progress report nga isumite sa UN Convention on Biological Diversity conference sa Yerevan, Armenia, sa sunod bulan.

Nagpahimangno ang draft nga gipagawas niadtong Hulyo nga walay bisan usa sa 23 ka tumong sa kasabotan ang makab-ot hangtod 2030 "unless collective implementation accelerates rapidly".

"Progress is being made clearly, but it is uneven, and it is clearly also not at the pace and scale required to achieve the Framework's 23 targets by 2030," matod ni Astrid Schomaker, executive secretary sa UNCBD, atol sa usa ka briefing karong bulana.

Sumala sa report sa Campaign for Nature, posibleng mapanalipdan ang mga 26% sa kayutaan ug mga katubigan sa sulod sa kontinente kon matuman ang tanang kasamtangang saad sa mga gobyerno hangtod 2030. Apan 13% lamang sa marine ecosystems ang masakop sa proteksyon.

Gipakita usab sa report nga adunay kakulang sa pondo nga gibanabanang $75 billion hangtod $150 billion kada tuig. Ang gigasto alang sa pagpanalipod sa kadagatan anaa lamang sa $1.8 billion, nga ubos kaayo sa gikinahanglang $16 billion.

Bisan makab-ot ang "30x30" targets, gikinahanglan gihapon ang dugang paningkamot aron masiguro nga tinuod nga mapanalipdan ang mga ecosystem, matod sa report. Sa 10% sa kadagatan nga kasamtangang sakop sa mga plano sa proteksyon, 3.5% lamang ang giisip nga epektibong naprotektahan.

"There's a significant gap between protection on paper and protection in practice. A line on a map does not mean protection in the water," matod ni Pauli Merriman, senior director for oceans sa WWF International.

-Ato ni Bai