Inahan ni VP Sara gusto nga mobalik siya sa Davao, ‘bahala na si Baste sa national’

Gibutyag ni Vice President Sara Duterte niadtong Martes nga giawhag siya sa iyang inahan nga si Elizabeth Zimmerman nga mobiya sa national politics ug mobalik sa local governance sa Davao, samtang gisugyot niini nga ang iyang igsoon nga si Davao City Mayor Sebastian “Baste” Duterte na lang ang modagan sa national office sa 2028.

Sa pakighinabi sa mga tigbalita, matod sa Vice President, direkta siyang gitambagan sa iyang inahan nga mopauli, samtang gidasig si Baste nga mosulay sa national level.

“Nagsabi talaga ‘yung nanay ko na pinapauwi niya ako ng Davao at si Baste na lang ang patakbuhin sa national elections,” matod ni Duterte.

Sa dihang gipangutana kon gikonsiderar ba sa pamilya si Mayor Baste isip alternatibong national candidate—ilabina human sa iyang bag-ohay nga testimony atubangan sa Senate impeachment court—giklaro ni Duterte nga ang ideya gikan lamang sa ilang inahan ug wala kini pormal nga nahisgutan sa pamilya.

“Sa pamilya namin, ‘yun lang ang napag-usapan… Hindi na-discuss,” dugang niya. “Sinabi ng nanay ko, sabi niya umuwi ka dito sa Davao tapos bahala na si Baste diyan sa national.”

Sa pagkakaron, nag-atubang ang Vice President og impeachment trial sa Senate tungod sa mga alegasyon nga naglakip sa paghatag og grave threats batok kang President Ferdinand Marcos Jr. ug ubang opisyal, sayop nga paggamit sa confidential funds, pagtigom og unexplained wealth, ug pagkalambigit sa bribery. Nag-atubang usab siya og tulo ka counts sa grave threats sa usa ka korte sa Quezon City.

-Ato ni Bai