%20(100%20x%20100%20px).png)
Global population sa wild species gikan 1970 hangtod 2022 miubos og 73% — report
Miubos og aberids nga 73% ang populasyon sa dul-an sa 6,000 ka namonitor nga vertebrate species sa kapin sa 35,000 ka populasyon gikan 1970 hangtod 2022, sumala sa World Wide Fund for Nature (WWF) sa pinakabag-o nitong Living Planet Report nga gipublikar niadtong Huwebes.
Ato ni Bai
October 9, 2026 at 7:24:28 AM
Naglakaw ang usa ka jaguar ibabaw sa kahoy nga tabla sa Senda Verde Wildlife Sanctuary sa Coroico, Bolivia, Setyembre 19, 2026. Dinhi nagpuyo si Tigrino, usa ka ihalas nga iring nga sakop sa bag-ong nailhang species nga Leopardus tilcayo gikan sa Yungas region sa Bolivia. Kini ang unang bag-ong species sa buhing iring nga pormal nga nahulagway sa kapin usa ka siglo.
Claudia Morales / Reuters
Miubos og aberids nga 73% ang populasyon sa dul-an sa 6,000 ka namonitor nga vertebrate species sa kapin sa 35,000 ka populasyon gikan 1970 hangtod 2022, sumala sa World Wide Fund for Nature (WWF) sa pinakabag-o nitong Living Planet Report nga gipublikar niadtong Huwebes.
Gimonitor sa Living Planet Index, nga gidumala sa Zoological Society of London (ZSL) ug WWF, ang kinatibuk-ang 35,803 ka populasyon nga naglangkob sa 5,790 ka lainlaing species sa mammals, birds, reptiles, amphibians ug fish sulod sa 52 ka tuig.
Gibanabana sa 2026 Living Planet Report nga miubos ang kinatibuk-ang populasyon og aberids nga 2.5% kada tuig sulod sa maong panahon.
"Monitored global populations continue to decline on average with no evidence yet of that global recovery," matod ni Andrew Terry, chief conservation officer sa ZSL.
Ang aberids nga pagkunhod sa namonitor nga mga populasyon wala magpasabot sa kinatibuk-ang gidaghanon sa mga mananap nga nawala gikan 1970 hangtod 2022. Ang maong porsiyento dali usab maapektuhan sa mga kausaban sa mga populasyon nga daan nang gamay ang gidaghanon.
Base sa index, miubos og aberids nga 85% ang populasyon sa namonitor nga mga species nga nagpuyo sa tab-ang nga tubig, samtang 69% ang pagkunhod sa mga species nga nagpuyo sa yuta ug 59% sa mga species nga nagpuyo sa dagat.
Ang South America ang nakasinati sa pinakadakong aberids nga pagkunhod sa populasyon nga mikabat sa 95%, samtang 80% usab ang pagkunhod sa Africa gikan 1970 hangtod 2022.
Gidugang sa 2026 Living Planet Report ang 295 ka species ug 967 ka populasyon, nga naglangkob sa mas taas nga panahon sa pagmonitor kon itandi sa miaging report niadtong 2024.
Matod ni Terry atol sa usa ka briefing, ang dugang nga datos "reinforces our confidence in the continued decline in biodiversity,".
Ang pagkawala ug pagkadaot sa natural nga puy-anan sa mga mananap maoy labing kanunay nga gitaho nga hulga. Apan sumala sa report, nameligro usab ang populasyon sa wildlife tungod sa sobrang pagpahimulos niini, climate change, polusyon, invasive species ug mga sakit.
"Amid these steep declines, there are grounds for hope, rooted in evidence. Wildlife populations are under pressure but recovery is in reach," matod ni Kirsten Schuijt, director general sa WWF.
Pinaagi sa mga paningkamot sa conservation nga gitumong sa partikular nga mga species, nakabawi ang populasyon sa pipila ka mananap, lakip ang mga tigre, Atlantic ug Pacific bluefin tuna, southern African elephants ug green sea turtles.
Matod ni Schuijt, gawas sa mga paningkamot sa conservation, gikinahanglan usab ang mga kausaban sa sistema sa enerhiya, pagkaon ug pinansya aron mapahunong ang pagkawala sa kinaiyahan.
-Ato ni Bai