Canadian nga si Anne Carson Nakadaog sa 2026 Nobel Prize in Literature

Nakadaog ang Canadian nga magbabalak ug magsusulat nga si Anne Carson sa 2026 Nobel Prize in Literature tungod sa iyang talagsaon ug mamugnaong mga sinulat nga naghiusa sa karaang tradisyon ug bag-ong mga pamaagi sa literatura, sumala sa naghatag sa pasidungog niadtong Huwebes.

Gihatag sa Swedish Academy ang maong pasidungog nga adunay premyong 12 milyon ka Swedish crowns ($1.2 milyon).

"She was very taken by surprise. We didn't have so much time to speak, and all she had time to tell me was that she is for the moment in Iceland, where she's listening to the wind," matod ni Ingrid Carlberg, permanent secretary sa Swedish Academy.

Sagaran nga gisagol ni Carson sa iyang mga sinulat ang balak, prosa, panag-istoryahanay ug mga hubad sa ubang sinulat, nga dili limitado sa usa lamang ka matang sa literatura. Natawo siya sa Toronto ug naghupot usab og pagkalungsoranon sa Iceland sukad 2022.

Nailhan si Carson sa iyang mga hubad sa karaang literatura sa Greece, nga dakog impluwensiya sa iyang mga sinulat. Naglakip kini sa mga teksto alang sa opera, pagsusi sa literatura ug mga nobelang gisulat sa porma sa balak, sama sa "Autobiography of Red" niadtong 1998.

"Almost all her literary production has centred upon the intersection between the philologist's obsession with words and the poet's desire for new meaning," matod sa Academy.

"She has herself identified the etymology of words as the starting point for all her work. Her translations from Classical Greek may be regarded as independent works in their own right."

Makita ang iyang estilo sa "Norma Jeane Baker of Troy" niadtong 2019, usa ka pasundayag nga naghiusa sa mga istorya ni Helen of Troy gikan sa dula ni Euripides nga "Helen" ug sa kinabuhi ni Marilyn Monroe.

CARSON USA SA MGA GILAUMANG MAKADAOG KARONG TUIGA

Apil ang 76-anyos nga si Carson sa mga gilaumang makadaog sa pasidungog karong tuiga, sumala sa kompanyang Ladbrokes nga nagdawat og pusta. Nakauban na siya sa han-ay sa mga bantogang magsusulat sama nila Alexander Solzhenitsyn, Alice Munro ug Ernest Hemingway nga nakadawat sa maong pasidungog, nga sagad hinungdan sa nagkalainlaing opinyon sa mga mahiligon sa libro.

Gisaway ang Swedish Academy tungod sa wala paghatag og pasidungog sa pipila ka bantogang magsusulat sa miaging 120 ka tuig, sama nila Leo Tolstoy, Virginia Woolf ug Jorge Luis Borges. Gisaway usab kini tungod sa giingong paglikay sa mga Amerikanong magsusulat, bisan pa nga gihatagan niini og pasidungog ang mag-aawit ug magsusulat og kanta nga si Bob Dylan niadtong 2016. Giakusahan usab ang Academy nga nagpili og mga magsusulat nga dili kaayo ilado.

Apan matod sa mga nagdepensa sa Academy, nakapili usab kini og mga sikat nga magsusulat sama sa Colombian nga si Gabriel Garcia Marquez niadtong 1982 ug Doris Lessing niadtong 2007. Ilang gipasiugda nga kabahin sa katungdanan sa Academy ang pagpaila sa mga tradisyon sa literatura nga dili kaayo ilado ug pagdasig sa mga magbabasa nga mosuhid sa mas daghang matang sa literatura.

Gisugdan ang paghatag sa Nobel Prizes niadtong 1901, pinasikad sa kataposang kabubut-on ni Alfred Nobel, usa ka Swedish nga imbentor sa dinamita ug negosyante. Gihatag ang mga pasidungog alang sa talagsaong mga nahimo sa literatura, siyensiya ug kalinaw.

Niaging tuig, nadaog sa Hungarian nga magsusulat nga si Laszlo Krasznahorkai ang pasidungog. Gitawag siya nga "master of the apocalypse" sa Amerikanong kritiko nga si Susan Sontag.

-Ato ni Bai