California judge gibabagan ang $100,000 H-1B visa fee ni Trump

Gibabagan sa ikaduhang federal judge niadtong Miyerkules ang wala pa sukad mahitabo nga $100,000 fee nga gipahamtang ni US President Donald Trump sa bag-ong H-1B visas alang sa highly skilled foreign workers.

Midesisyon si US District Judge Haywood Gilliam sa Oakland, California, nga ang US Citizenship and Immigration Services ug State Department napakyas sa pagsunod sa gikinahanglang rule-making processes sa wala pa ipatuman ang fee ni Trump.

Si Gilliam, nga gitudlo ni kanhi President Barack Obama, usa ka Democrat, miuyon sa hangyo sa coalition sa unions, employers, ug nonprofits nga babagan ang mga ahensiya sa pagpatuman sa fee ni Trump samtang gihulat ang resulta sa lawsuit nga ilang gisang-at niadtong Oktubre.

Temporaryo nang gibabagan ang fee niadtong Hunyo sa usa ka federal judge sa Boston sa iyang desisyon sa laing kaso nga gisang-at sa 20 ka states. Niadtong Hulyo, wala miuyon ang Boston-based appeals court nga ihunong ang maong desisyon.

Niadtong Agosto, milihok ang Department of Homeland Security aron magpatuman og permanenteng fee nga mga $103,000 nga, kon ma-finalize, lagmit nga hagiton sa korte. Apan maglakip kini og lahi nga legal issues kumpara sa mga lawsuit bahin sa fee nga gitakda ni Trump. Ang maong mga kaso nagtutok sa gahum sa presidente sa unilateral nga pagtakda sa ingon nga fee.

Ang $100,000 fee orihinal nga gitakdang matapos sa Setyembre 21, apan bag-o lang gipalugway ni Trump, usa ka Republican, sulod sa usa pa ka tuig.

Wala dayon mitubag ang White House sa hangyo alang sa komento.

Gidayeg sa Democracy Forward, usa ka left-leaning legal group nga nagrepresentar sa mga plaintiff, ang desisyon pinaagi sa usa ka statement. "Today’s decision ... protects a system that was thrown into chaos overnight," matod ni Steve Bressler, usa ka abogado sa grupo.

Ang US Chamber of Commerce, ang pinakadakong business lobbying group sa nasod, nagsang-at og ikatulong lawsuit nga naghagit sa fee. Giapelar sa chamber ang desisyon sa usa ka judge nga nagsalikway sa ilang claim nga walay awtoridad si Trump sa pagtakda sa fee.

Gitugotan sa H-1B program ang US employers nga mo-hire og foreign workers nga adunay training sa specialty fields. Ang mga technology company ilabina kusog nga nagsalig sa mga worker nga nakadawat og H-1B visas.

Nagtanyag ang programa og 65,000 ka visas matag tuig, uban sa dugang nga 20,000 ka visas alang sa mga worker nga adunay advanced degrees, nga giaprubahan sulod sa tulo hangtod unom ka tuig.

Dakong gipataas sa order ni Trump ang gasto sa pagkuha og H-1B visas, nga kasagarang adunay mga $2,000 hangtod $5,000 nga fees, depende sa nagkalainlaing factors.

Sa pagpahamtang sa fee, gigamit ni Trump ang gahum sa presidente ubos sa federal immigration law sa pagpugong sa pagsulod sa pipila ka foreign nationals nga mahimong makadaot sa interes sa US. Miingon siya nga giabuso sa mga negosyo ang H-1B program ug gipulihan ang mga American worker og mas barato nga foreign labor.

Gimandoan usab sa Trump administration ang mas hugot nga vetting sa H-1B applicants ug gisugyot ang usa ka bag-ong visa selection process nga mopabor sa mas highly skilled ug mas taas og sweldo nga mga worker.

-Ato ni Bai