Asian Games giablihan sa mabulukong seremonya sa Nagoya

Giablihan ang 20th Asian Games sa Nagoya niadtong Sabado pinaagi sa mabulukong seremonya nga adunay sayaw ug fireworks, human sa mga problema sa operasyon ug logistics atol sa mga pagpangandam.

Lima ka tuig human gihimo ang Tokyo Olympics sa walay spectators tungod sa COVID-19 restrictions, giabiabi sa Japan ang mga fans sa Mizuho Park Athletic Stadium alang sa opening ceremony nga hilom ang pagsugod sa wala pa kini napuno sa kolor ug tingog.

Opisyal nga gideklarar ni Emperor Naruhito nga abli na ang Games human niya matan-aw ang parade sa 45 ka nasod ug rehiyon uban ni International Olympic Committee boss Kirsty Coventry ug uban pang dignitaries.

Gipahugtan ang seguridad atol sa pagbisita ni Naruhito uban sa mga miyembro sa royal family. Kaniadto, gipahayag sa organizers nga hangtod 10,000 ka police ang ibutang alang sa seremonya.

"While the world is too often divided by conflict, they (the Asiad athletes) remind us that sport remains a powerful force for peace, understanding and friendship among nations," matod ni Olympic Council of Asia President Sheikh Joaan bin Hamad Al Thani sa iyang speech.

MGA REKLAMO GIKAN SA ATHLETES UG OFFICIALS

Dungan nga gidagkutan nila Shigenobu Murofushi ug iyang anak nga si Koji Murofushi, parehong kanhing Asian Games champions sa hammer throw, ang cauldron human mosaka sa hagdanan sa pagtapos sa torch relay.

Gilauman sa organizers nga ang seremonya makatabang nga malabwan ang lisod nga pagpangandam sa Games, diin adunay mga reklamo gikan sa athletes ug officials bahin sa accommodation ug transportasyon.

Nailalom sa pagsusi ang reputasyon sa Japan sa tukma ug episyenteng pagdumala samtang giabiabi sa nasod ang kapin sa 11,000 ka athletes nga magkompetensya alang sa 369 ka gold medals sa 43 ka sports.

Imbis magtukod og kaugalingong Games village, gipapuyo sa organizers ang athletes ug officials sa mga hotel room, temporaryong wooden containers ug cruise ship nga nakadunggo sa bay aron makamenos sa gasto.

Daghang national team delegations, lakip ang host nga Japan, ang wala matagbaw sa accommodation arrangements ug mireklamo bahin sa mga sayop ug double-bookings. Gipahayag usab sa South Korea nga huot ra kaayo ang mga container sa Garden Pier alang sa ilang basketball players.

Ang cricket board sa India mismo ang nangitag laing accommodation alang sa star-studded men's cricket team, nga gipapuyo sa laing hotel tungod sa limitado nga gidaghanon sa beds nga gi-allocate sa organizers.

Mireklamo usab ang mga delegations sa taas nga paghulat alang sa registration sa athletes sa ilang pag-abot, ingon man sa mga bus nga maulahi o magdala sa athletes ngadto sa sayop nga venues.

Giila sa Olympic Council of Asia, nga nagdumala sa Games matag upat ka tuig, ang mga problema niadtong Sabado apan gihulagway kini nga mga problema lamang sa unang bahin sa operasyon.

Gidirekta ni Yukihiko Tsutsumi ang opening ceremony, nga nagsugod sa yano nga paagi pinaagi sa classical music ug sayaw sa heart-shaped stage sa wala pa ang parade of nations, diin apil ang delegation gikan sa North Korea.

Mas misadya ang seremonya sa ulahi, diin adunay mga dancers nga nagsul-ob og boiler suits isip pagpakita sa manufacturing tradition sa Nagoya, ug gitapos ang gabii pinaagi sa fireworks display.

"Harmonic Heart Beat" ang tema sa seremonya, nga gitumong sa pagpakita sa panaghiusa sa Asia sa usa ka sporting event nga kasagarang maapektuhan sa geopolitical tensions ug makasaysayang mga panagbangi.

Apan naapektuhan na ang paglaom alang sa malinawon nga Games tungod sa pipila ka insidente.

Temporaryong mibalibad ang delegation sa Taiwan sa pag-apil sa ilang welcoming ceremony niadtong Biyernes human wala tugoti nga makatambong si sports minister ug kanhing Olympic champion Lee Yang.

Nasuko ang South Korean men's hockey team human ang national anthem sa North Korea ang gipatokar sa stadium sa wala pa ang usa ka duwa imbis ang ilang kaugalingong national anthem.

Bisan nagsugod na ang competitions sa basketball, soccer ug uban pang sports, ang unang gold medal igahatag sa Domingo, nga lagmit sa triathlon.

Magsugod usab sa Tokyo sa Domingo ang usa ka high-level swimming competition, diin apil sa programa si China's 100 metres freestyle world-record holder Pan Zhanle ug ang 13-anyos nga si Yu Zidi.

Gawas sa traditional Olympic sports, ipahigayon usab sa Games ang regional favorites nga kabaddi ug sepak takraw, uban sa mas bag-o ug modernong events.

Maghatag pag-usab og medals ang esports human sa debut niini sa Hangzhou, samtang ang teqball, nga kombinasyon sa table tennis ug soccer, ug "virtual taekwondo" unang higayon nga iapil sa Games.

-Ato ni Bai