‘Gracias’: Lionel Messi nagtapos sa 21 ka tuig nga international career

Nagpakita si Lionel Messi og katapusang master class nga nagsul-ob sa asul ug puti niadtong Martes, samtang gitapos sa Argentina captain ang iyang talagsaong 21 ka tuig nga international career pinaagi sa usa ka goal ug duha ka assists sa 3-0 nga kadaugan batok sa Benin.

Ang katapusang duwa sa 39-anyos atubangan sa kapin 85,000 ka fans sa puno nga Monumental stadium dili lamang bahin sa football, kondili usa ka national celebration sa kontribusyon ni Messi sa national team.

Misidlak sa asul ug puti nga mga kolor sa team ang mga landmarks sa tibuok kapital, samtang gipadan-ag sa fireworks ang kalangitan ibabaw sa puno nga stadium ug kusog nga gikanta sa mga fans ang national anthem sa Argentina.

"It's hard to talk," matod ni Messi, kansang pamilya mapasigarbohong nagtan-aw gikan sa stands kauban ang pipila sa World Cup winners sa Argentina niadtong 1978, 1986 ug 2022.

"There are a lot of emotions, a lot of things going through my head. The first thing I think about is my old man," dugang niya, nga nagtumong sa bag-ohay nga pagkamatay sa iyang amahan.

"It was a huge source of pride for me to wear this shirt all this time, more than 20 years.

"Not coming anymore is going to hurt a lot. I swear, I'd love to keep coming my whole life, because playing for Argentina is the most beautiful thing that can happen to you."

‘GRACIAS’

Pipila ka oras sa wala pa ang duwa, usa ka dako kaayong No. 10 shirt nga adunay nakasulat nga "Gracias" ang gibuklad sa National Flag Memorial sa Rosario, ang hometown ni Messi.

Samtang nagbiyahe ang team bus gikan sa training centre nga nagdala sa iyang ngalan, gipahiran ni Messi ang iyang mga luha samtang liboan ka tawo ang naglinya sa agianan.

Sa dihang misulod sa pitch ang mga team, daw nawad-an og masulti ang captain sa Benin samtang gihatagan niya si Messi og regalo ug sulat atol sa pre-match handshake.

Human sa walay goal nga first half, gihatagan ni Messi og assist si Nicolas Otamendi aron maigo ang opening goal sa Argentina. Nakauban ni Otamendi si Messi sulod sa 17 ka tuig sa national team, lakip ang upat ka World Cups, ug gitapos usab niya ang iyang international career.

Gihatagan dayon ni Messi og assist si Nico Paz, usa sa mga player nga giisip nga posibleng mosunod sa pagsul-ob sa No. 10 shirt sa Argentina, aron makuha ang ikaduhang goal.

Sa usa ka fairytale ending, naigo ni Messi ang penalty alang sa 3-0, ang iyang ika-126 nga international goal, nga gisundan na usab sa mga singgit nga "Messi, Messi" gikan sa crowd.

Sa pagtapos sa duwa, miduol kang Messi ang iyang teammates, opponents ug referee aron mogakos kaniya sa wala pa gipadan-ag sa drone show ang kalangitan. Dayon gikanta sa Argentine singer nga si Soledad Pastorutti, nga nailhan isip "La Sole", ang iyang signature song nga "Brindis" isip bahin sa tribute kang Messi ug sa iyang panaw uban sa national team.

Gitapos ni Messi ang iyang international career isip player nga adunay pinakadaghang appearances alang sa nasod (208) ug record scorer, human niya nabag-o ang mga tuig sa kapakyasan sa international stage ngadto sa istorya sa mga kadaugan sa World Cup ug Copa America.

Sulod sa daghang tuig, naghulat ang Argentina nga hatagan sila ni Messi og kadaugan. Niadtong Martes, miadto lamang kini aron moingon og 'Thank You'.

-Ato ni Bai