Supermodel Naomi Campbell Midaog sa Apela Batok sa Lima ka Tuig nga Pagdili Isip Charity Trustee

Midaog si supermodel Naomi Campbell niadtong Huwebes sa iyang apela batok sa lima ka tuig nga pagdili kaniya nga mahimong charity trustee, human mimando ang tribunal sa London nga gitago gikan kaniya ang sayop nga paggamit sa pondo sa charity nga iyang gitukod.

Gitukod ni Campbell, usa sa labing iladong nawong sa kalibotan sa fashion, ang Fashion For Relief niadtong 2005 aron makatigom og pondo alang sa humanitarian nga mga katuyoan pinaagi sa pagpahigayon og mga runway show.

Apan gitangtang kini sa Charity Commission gikan sa rehistro niadtong 2024 ug wala madugay gidid-an si Campbell nga mahimong trustee human sa mga reklamo bahin sa sayop nga pagdumala ug misconduct.

Nakaplagan sa Charity Commission ang kaylap nga sayop nga pagdumala sa kuwarta, lakip ang paggasto sa pondong gitigom alang unta sa maayong mga katuyoan sa spa treatments, sigarilyo ug room service sa dihang nagpuyo si Campbell sa usa ka five-star hotel duol sa Cannes sa habagatang France niadtong Mayo 2018.

Nakadawat usab ang usa ka abogado nga trustee sa charity og mga £290,000 ($382,771) nga walay pagtugot nga bayad alang sa giingong consultancy fees.

Apan matod ni Campbell, wala siya mahibalo nga gigamit ang pondo sa charity sa iyang mga gasto ug gilimbongan siya sa laing trustee bahin sa mga bayad nga walay pagtugot.

Gidawat sa First-Tier Tribunal ang iyang apela ug miingon sa desisyon niini nga adunay “serious misconduct and mismanagement” sa Fashion For Relief, apan gitago gikan kang Campbell ang mga bayad nga walay pagtugot ug ang sayop nga paggamit sa pondo.

Nakaplagan usab sa tribunal nga si Campbell “was not responsible for the inappropriate use of the charity’s resources or any unjustified expenditure” atol sa iyang pagpuyo sa hotel niadtong 2018.

Si Campbell “did share ultimate responsibility for the charity’s failure to keep proper minutes and file its accounts on time”, dugang sa tribunal, apan mimando kini nga dili kini nagpasabot nga dili siya angayan mahimong charity trustee.

Wala dayon mikomentaryo ang spokesperson ni Campbell ug ang Charity Commission. -Ato ni Bai