Singer D4vd nag-ilis og abogado human kasuhan sa pagpatay ug pagputol-putol sa lawas sa tin-edyer

Giilisan sa musician nga si D4vd ang iyang defense team niadtong Lunes ug mipili sa Los Angeles public defender’s office samtang nag-atubang siya og trial sa mga kaso nga iyang gidunggab ug giputol-putol ang lawas sa usa ka 14-anyos nga babaye nga giingong mihulga nga ibutyag ang ilang sekretong relasyon.

Mitambong si D4vd, 21, kansang tinuod nga ngalan mao si David Anthony Burke, sa Los Angeles Superior Court niadtong Lunes. Nahitabo kini usa ka bulan human nakita ni Judge Charlaine Olmedo nga adunay probable cause aron ipaatubang siya sa trial, human sa pipila ka adlaw nga hearing diin gipresentar sa prosecutors ang detalyadong testimonya ug makalilisang nga crime-scene photos isip ebidensya.

Gisultihan sa iyang lead lawyer nga si Blair Berk, nga nakadepensa na sa daghang celebrities sa ubang mga kaso, ang judge nga nangayo si Burke og bag-ong legal representation, apan wala niya isulti ang hinungdan, sumala sa Los Angeles Times.

Wala dayon matin-aw kon giunsa pagka-qualify ni Burke sa pinansyal nga bahin aron makadawat og tabang gikan sa public defender, tungod sa iyang dakong kita sa music career. Sa usa ka pahayag, miingon ang kanhing legal team ni Burke nga gitugotan sa korte ang ilang hangyo nga moundang isip iyang counsel “after it was determined David qualified for appointed counsel.”

Sa Oktubre ang sunod nga court date ni Burke, sumala sa KABC sa Los Angeles.

Gisugdan ni Burke ang iyang career isip viral TikTok sensation, diin ang iyang unang hit single nga “Romantic Homicide” mitultol sa multimillion-dollar deal sa Interscope Records. Gipagawas ang iyang debut studio album niadtong Abril 2025, sa samang semana nga giingon sa prosecutors nga nawala ang iyang menor de edad nga girlfriend nga si Celeste Rivas Hernandez.

Nakit-an ang nagkadunot niyang lawas lima ka bulan ang milabay, gisulod sa atubangang trunk sa usa ka Tesla sedan nga giingon sa mga awtoridad nga nakarehistro kang Burke. Gidakop ang singer-songwriter niadtong Abril karong tuiga ug gikasuhan og first-degree murder, mutilation of human remains, ug child sexual abuse.

Giingon sa prosecutors nga gipatay ni Burke ang babaye tungod sa kahadlok nga madaot ang iyang nagsugod og sikat nga career human mihulga ang biktima nga ibutyag sa publiko ang ilang sexual relationship.

Giingon sa prosecutors nga gidunggab ni Burke hangtod namatay ang babaye sa iyang balay sa Hollywood Hills niadtong Abril 23, 2025. Atol sa evidentiary hearing niaging bulan, gipakita sa prosecutors ang mga litrato sa tulo ka chainsaw, usa ka pala, ug ubang mga butang nga giingon nilang gipalit ni Burke online gamit ang fictitious name ug gipadala sa iyang balay human sa pagpatay.

Lakip sa mga butang ang usa ka plastik nga asul nga inflatable swimming pool nga giingon sa prosecutors nga gigamit ni Burke aron dili mokatag ang dugo sa salog sa iyang garahe sa dihang giputol-putol ang lawas sa biktima.

Sumala sa prosecutors, gitandi sa mga awtoridad ang genetic profile sa biktima sa DNA samples nga nakuha gikan sa garahe ni Burke ug nakit-ang nagtugma kini. -Ato ni Bai