Sen. JV Ejercito Mipasidaan Batok sa Paghimong ‘Theme Park’ sa Pinaglabanan Shrine

Giawhag ni Senate Senior Deputy Majority Leader JV Ejercito ang mga awtoridad nga undangon ang pagtratar sa Pinaglabanan Shrine sa San Juan City sama sa usa ka “theme park” human gibalhin ngadto sa maong lugar ang pipila ka makasaysayang monumento.

Sa iyang privilege speech alang sa Pinaglabanan Day ug National Heroes Day, mipahayag si Ejercito og kabalaka bahin sa mga ordinansa sa siyudad nga gipasa niadtong 2021 nga nagbalhin sa mga monumento nila Gat Andres Bonifacio, Emilio Jacinto, ug Dr. Jose Rizal gikan sa ilang orihinal nga pampublikong mga lokasyon ngadto sa shrine.

“The Pinaglabanan Shrine is not a theme park where different monuments are simply brought together because they share a similar theme,” matod ni Ejercito.

Una nang midepensa ang San Juan City government sa pagbalhin sa mga monumento, tungod sa kabalaka sa kaluwasan sa ilang orihinal nga mga lokasyon ug sa tinguha nga mahatagan og mas angay nga lugar ang mga nasudnong bayani. Apan matod ni Ejercito, ang pagbalhin sa mga estatwa makabalda sa lokal nga kasaysayan.

“Monuments are landmarks. They serve as markers of an important event, form part of a community’s identity, and serve as a bridge between the present and the past,” gipasiugda ni Ejercito. “When we tamper with a landmark, we are not merely moving stone or metal. We are moving the collective memory of a place.”

Bisan giklaro niya nga dili siya supak sa mga lakang alang sa kaluwasan sa publiko, giinsistir sa senador nga ang pagbalhin sa makasaysayang mga monumento nagkinahanglan og tukmang pagtuon, heritage impact assessments, conservation plans, ug halapad nga konsultasyon sa publiko uban sa mga historian ug residente. Gisugyot niya nga sulbaron sa mga lokal nga opisyal ang kaluwasan sa trapiko pinaagi sa pag-usab sa disenyo sa mga dalan, pagbutang og protective barriers, ug pagpaayo sa suga imbis nga ibalhin ang mga estatwa.

“History and public welfare should not be pitted against each other,” matod niya, ug midugang nga ang mga monumento iya sa publiko ug dili sa bisan kinsang politiko.

Si Ejercito, nga nagsilbing mayor sa San Juan niadtong 2002, maoy nagpahimo sa mga monumento nila Bonifacio ug Jacinto ug sa ulahi nakigtambayayong sa National Historical Commission of the Philippines aron matukod ang Museo ng Katipunan niadtong 2004. Gipatin-aw niya nga ang mga monumento orihinal nga gibutang daplin sa mga busy nga dalan aron adlaw-adlaw nga mahinumdoman sa mga estudyante, trabahante, ug pasahero ang mga nakigbisog alang sa kagawasan sa nasod.

Human mapatuman ang Republic Act No. 12250 niadtong 2025, nga opisyal nga nagtudlo sa Agosto 30 isip Pinaglabanan Day sa San Juan, giawhag ni Ejercito ang mga Pilipino nga ipadayon nga bahin sa adlaw-adlaw nga kinabuhi ang kabilin sa mga nasudnong bayani.

“True respect can be seen in the way we preserve the things, places, and memories they left behind,” matod ni Ejercito. “I hope we do not treat them like expensive glasses or plates kept inside a display cabinet and brought out only during fiestas. Our heroes deserve to be showcased, not put in a display case.” -Ato ni Bai