Sarah Geronimo Mobalik sa Trabaho sa 2027 Matod sa Viva

Gipaabot nga mobalik sa trabaho si Sarah Geronimo sa 2027, sumala kang Viva Communications Chairman and CEO Vic del Rosario.

“Next year, magtatrabaho na [si Sarah Geronimo]. Ayun lang ang masasabi ko,” matod ni Del Rosario atol sa closing ceremony sa Philippine Film Industry Month, diin nakadawat siya og Lifetime Achievement Award gikan sa Film Development Council of the Philippines (FDCP).

Bisan wala niya direktang gikumpirma ang mga taho nga posibleng mabdos si Sarah, gipakita ni Del Rosario nga dili pa kini makabalik sa trabaho karon.

“Ayaw kong manggaling sa akin pero parang alam naman ng mga tao na hindi siya puwedeng magtrabaho,” dugang niya.

“Sa ngayon, hindi pa siya pwedeng magtrabaho dahil she’s enjoying her happy life.”

Bisan wala pay bag-ong proyekto sa pag-arte si Sarah, padayon siyang nagkapuliki sa iyang mga endorsement.

Gihimo ni Del Rosario ang maong mga pahayag taliwala sa padayong mga pangagpas nga si Sarah, 38, ug iyang bana nga si Matteo Guidicelli, 36, posibleng nagpaabot sa ilang unang anak.

Mas nakakuha og pagtagad ang mga hungihong niaging Agosto human mipaambit si Matteo og ultrasound teaser sa social media. Nakapukaw kini sa mga fans, diin daghan ang unang nagtuo nga posible kining timailhan nga mabdos si Sarah.

Midugang sa mga pangagpas niaging bulan ang usa ka higala nga nakahimamat kang Matteo sa usa ka coffee shop sa Quezon City ug mipaambit sa Facebook og hulagway nila sa actor-host, nga iya usab dayong gitangtang. Gihinumdoman niya ang ilang panaghigalaay ug nangaging mga kalihokan nga may kalabotan sa militar sa wala pa siya midugang, “He is soon to be a daddy. Congratulations, bro!”

Paspas nga mikatap sa internet ang post, nga mas nakadugang sa mga pangagpas nga posibleng nagpaabot og anak sila Sarah ug Matteo. Apan wala pa gikumpirma sa publiko nila Sarah o Matteo ang pagmabdos.

Niadtong Huwebes, mipaambit na usab si Matteo og matam-is nga higayon nila ni Sarah sa social media pinaagi sa pag-post og hulagway nilang duha nga naggakos.

Nagsugod og uyab sila Sarah ug Matteo niadtong 2013 ug naminyo niadtong 2020 sa pribadong seremonya sa Taguig City. -Ato ni Bai