Prince William mipahunong sa trapiko aron magduwa og cricket duol sa Buckingham Palace

Gihimong temporaryong dulaanan sa cricket ni Britain's Prince William ang The Mall, usa sa labing iladong dalan sa London nga padulong sa Buckingham Palace, niadtong Martes. Giubanan siya sa pipila sa mga bantogang magdudula sa cricket aron ipasiugda ang iyang Earthshot climate prize.

Ang lapad nga dalan nga adunay pulang sementadong agianan sa sentro sa siyudad kasagarang gigamit alang sa dagkong parada sa harianong pamilya ug mga selebrasyon nga adunay pagwarawara sa mga bandera sa nasud.

Apan niadtong Martes, migunit si William og cricket bat aron makigduwa sa kasamtangan ug kanhing mga international player, lakip si kanhing Indian captain Sourav Ganguly, West Indies legend Brian Lara, ug England captain Joe Root.

Atubangan sa Buckingham Palace, si William, nga nagsul-ob og polo ug sweater, nakahapak sa sunod-sunod nga hinay nga mga bola nga gilabay ni Ganguly ug nakig-selfie usab sa mga tawo nga nagtan-aw.

"He batted alright," matod ni Ganguly sa dihang gipangutana bahin sa abilidad sa prinsipe sa pagduwa.

Gipahigayon ang maong kalihokan aron sa pagsaulog sa lig-ong relasyon tali sa Britain ug India, duha ka nasud nga mahiligon sa cricket, samtang nangandam ang India sa pag-host sa tinuig nga summit ug awards ceremony sa Earthshot Prize ni William sa sunod bulan.

Ang maong award, nga gitukod niadtong 2020, naghatag og £1 milyon ($1.32 milyon) matag usa sa lima ka mananaog aron mapalapad ang ilang mga solusyon nga nagtumong sa pag-ayo ug pagpanalipod sa kalikopan.

-Ato ni Bai