top of page
Bai (150 x 150 px) (100 x 100 px).png

Pride march sa Buenos Aires, giapilan sa liboan ka tawo sa wala pa ang pagbisita ni Pope Leo XIV

Miapil ang liboan ka tawo sa ika-35 nga Pride march sa Buenos Aires, Argentina, niadtong Sabado, Nobyembre 7, aron sa pagsaulog sa pagkalain-lain sa sekswalidad ug pagpangayo og dugang katungod alang sa LGBTI+ community, usa ka adlaw sa wala pa ang pag-abot ni Pope Leo XIV sa nasod. Nagsayaw ug nanganta ang mga partisipante sa kadalanan samtang nagparada ang mga sakyanan nga adunay musika. May mga babaye usab nga nagtugtog og tambol ug mga nagmartsa nga nagdala og mga karatula, lakip ang usa nga nanawagan nga bulagon ang simbahan ug estado.

Reuters / Paraluman News; Gihubad ni Herli Mae Virador / Ato Ni Bai

November 8, 2026 at 12:14:01 PM

Mga partisipante sa Pride parade sa Argentina nga nagsul-ob og sinina nga adunay kolor sa rainbow samtang nagpalupad og mga bula.

Usa ka grupo sa mga lalaki ang nagpabuto og mga bula atol sa LGBTQ+ Pride Parade sa Buenos Aires, Argentina, Nobyembre 7, 2026.

Reuters / Cristina Sille

Miapil ang liboan ka tawo sa ika-35 nga Pride march sa Buenos Aires, Argentina, niadtong Sabado, Nobyembre 7, aron sa pagsaulog sa pagkalain-lain sa sekswalidad ug pagpangayo og dugang katungod alang sa LGBTI+ community, usa ka adlaw sa wala pa ang pag-abot ni Pope Leo XIV sa nasod. Nagsayaw ug nanganta ang mga partisipante sa kadalanan samtang nagparada ang mga sakyanan nga adunay musika. May mga babaye usab nga nagtugtog og tambol ug mga nagmartsa nga nagdala og mga karatula, lakip ang usa nga nanawagan nga bulagon ang simbahan ug estado.


Matod ni Javier Diaz Rey, usa ka magtutudlo sa teatro, wala siya magproblema sa mga kausaban sa pipila ka plano tungod sa pagbisita sa Santo Papa. Gidawat usab niya ang maong pagbisita ug nangayo nga hatagan og samang respeto ang ilang Pride march.


Ubos sa slogan nga “Kung mokaylap ang pagdumot, ang pagpakita sa garbo sa kadalanan usa ka porma sa pagsukol,” nanawagan ang mga organizer nga ipatuman ang usa ka komprehensibong balaod alang sa mga transgender, bag-ong balaod batok sa diskriminasyon, ug deklarasyon sa emergency sa sexual health, sumala sa lokal nga news outlet nga EFE. Nahitabo usab ang selebrasyon karong tuiga human sa usa ka pag-atake batok sa mga transgender sex worker nga nakapakurat sa katilingban sa Argentina, sumala sa maong ahensiya.


Una nang gidili sa kagamhanan sa Buenos Aires ang mga publikong kalihokan gikan Nobyembre 6 hangtod 13 tungod sa mga preparasyon sa seguridad ug uban pang kinahanglanon alang sa pagbisita sa Santo Papa. Gisugyot sa mga opisyal sa siyudad, nga gipangulohan ni Mayor Jorge Macri, nga ibalhin ang Pride march sa Nobyembre 21, apan wala kini dawata sa mga organizer. Sa ulahi, nagkauyon ang duha ka bahin nga ipadayon ang martsa sa Nobyembre 7 ug usbon na lang ang agianan niini.


Mobisita ang Santo Papa sa Argentina gikan Nobyembre 8 hangtod 11. Sukad 1997, gihimo na sa Argentina ang Pride march matag unang Sabado sa Nobyembre.



-

bottom of page