Olivia Rodrigo gihimong cover star sa Vogue PH, mipamalandong sa Daisy Chain Fields festival

Gihimong cover star si Olivia Rodrigo sa September/October 2026 Anniversary Issue sa Vogue Philippines.

Gihisgutan sa 23-anyos nga Filipino American sa magasin ang Daisy Chain Fields, usa ka music festival nga nakasentro sa mga babaye nga siya mismo ang nagplano ug nagpili sa mga artist, nga gihimo niadtong Agosto 29 sa Great Park sa Irvine, California.

Dugay nang gihunahuna ni Rodrigo ang paghimo sa maong festival. Gipaambit niya nga nagsugod ang iyang interes sa ideya sa usa ka all-women music festival sa dihang pito pa siya ka tuig ang edad, human niya madiskobrehan ang Lilith Fair pinaagi sa revival niini niadtong 2010.

“I always kind of hoped that someone would recreate it with all of the most incredible women artists of today,” matod niya sa Vogue Philippines. Sa ulahi, nakaamgo siya nga mahimo niyang buhaton mismo ang maong ideya. “If anyone can do it, I can probably do it,” matod niya.

Gisugdan niya paghimong konkretong plano ang ideya pinaagi sa pagbutang og dakong whiteboard sa iyang kwarto aron ilista ang mga artist nga gusto niyang maapil ug ang mensahe nga gusto niyang ipakita sa festival.

Alang sa visual identity niini, mikuha si Rodrigo og inspirasyon gikan sa Summer of Love flower children sa Monterey Pop ug riot grrrl zines sa dekada ’90, nga gisagol ang mga elemento gikan sa duha ka panahon.

“I’ve been writing music and making music for so long. Being able to curate a festival is a totally different skill…It’s been a real joy,” matod niya.

Sa dihang andam na siyang himuong realidad ang Daisy Chain Fields, si Sarah McLachlan ang unang iyang gitawagan, nga iyang gihulagway nga “wonderful and supportive.” Personal usab nga gikontak ni Rodrigo ang ubang mga artist nga gusto niyang maapil sa lineup ug nalipay siya nga interesado kaayo silang moapil.

Gitigom sa unang festival ang dagkong mga ngalan sa musika, lakip ang Bikini Kill, Chappell Roan, ug Doechii, uban sa uban pa. Gawas kang McLachlan, mitukar usab ang music icons nga sila Alanis Morissette ug Stevie Nicks, samtang si Rodrigo ang headliner sa kalihokan.

Gawas sa musika, gihimo ang Daisy Chain Fields aron makatigom og pondo alang sa mga organisasyon nga nagpasiugda sa kaayohan sa mga babaye ug mga batang babaye sa US ug sa tibuok kalibotan. Una kining nakatigom og $10 milyon alang sa 10 ka nonprofit partners, ug sa ulahi midugang si Melinda French Gates og laing $10 milyon, nga nagdala sa kinatibuk-ang natigom ngadto sa $20 milyon.

Sa iyang concert ug pagbisita sa Pilipinas duha ka tuig ang milabay, gipresyohan ni Rodrigo ang tanang tickets og ₱1,500, ug 100 porsyento sa halin niini gihatag sa Jhpiego aron suportahan ang libreng healthcare services niini alang sa mga babaye ug mga batang babaye.

Gisultihan usab si Rodrigo bahin sa usa ka Filipino fan nga mikomento sa YouTube nga ang pagtambong sa show “indirectly saved” sa kinabuhi sa ilang pamilya. Nahibaw-an sa iyaan sa fan ang bahin sa Jhpiego pinaagi sa kalihokan ug nakadawat og libreng cervical cancer screening, nga nakatabang sa mga doktor nga sayong makit-an ang cancer.

“Oh my god, that’s so moving. It almost brings me to tears,” matod ni Rodrigo. Midugang siya nga dako ang iyang pasalamat nga adunay siyay platform nga nagtugot kaniya sa pagpaambit og mga resources nga tinuod nga makatabang sa mga tawo.

Pinaagi sa Daisy Chain Fields, naglaom si Rodrigo nga mapalambo pa ang samang pagbati sa koneksyon samtang hatagan og mas dakong platform ang mga babayeng artist ug mga organisasyon.

Gusto niya nga ang festival “amplify women who are doing great things in the world, achieving their goals and their creative dreams,” samtang nagdasig sa mga batang babaye sa audience nga tumanon ang ilang kaugalingong mga damgo ug ipahayag ang ilang tingog. -Ato ni Bai -