Mt. Balatukan, hapit nang mahimong ASEAN Heritage Park

Hapit nang mahimong ika-70 nga Association of Southeast Asian Nations (ASEAN) Heritage Park ang Mount Balatukan Range Natural Park sa Mindanao, Pilipinas.

Miingon ang ASEAN Centre for Biodiversity (ACB) niadtong Huwebes nga ang nature park, kauban ang Prek Toal Ramsar Site sa Cambodia, giendorso na alang sa maong designation ug naghulat na sa “ad referendum approval” sa ASEAN Ministerial Meeting on the Environment.

“This is a testament to the region’s commitment to preserving and restoring its immense natural wealth by strengthening connectivity, improving management, sharing best practices, capacity building, and the development of innovative awareness-raising activities,” matod ni ACB Executive Director Jerome Montemayor.

Ang Mount Balatukan Range Natural Park sa Pilipinas, nga nahimutang sa silangang bahin sa Misamis Oriental, giila isip Key Biodiversity Area ug Important Bird Area.

Nailhan kini tungod sa daghang endemic species gikan sa nagkalain-laing taxonomic groups ug puy-anan sa critically endangered nga mga tanom ug mananap, lakip ang Philippine Eagle (Phitecophaga jefferyi) ug Rafflesia (Rafflesia verrucosa).

Importante usab sa kultura ang natural park ug nagsilbing sagradong lugar alang sa Higaonon tribe.

Samtang, nailhan ang Prek Toal Ramsar Site sa Cambodia isip pinakadakong breeding area sa mga waterbird sa rehiyon ug pinakadakong core area sa UNESCO’s Tonle Sap Biosphere Reserve.

Gisuportahan kini sa talagsaong Mekong flood-pulse system, nga maoy nagpalihok sa seasonal hydrological dynamics.

Isip kabahin sa AHP nomination review process, nakigkoordinar ang ACB sa technical evaluators, Department of Environment and Natural Resources sa Pilipinas, ug Ministry of Environment sa Cambodia aron magpahigayon og field evaluation missions sa duha ka lugar sa sayong bahin niining tuiga.

Miingon ang ACB nga nakadawat usab kini og tulo pa ka AHP nominations gikan sa Lao PDR ug Thailand ug kasamtangang nag-evaluate sa mga dokumento ug nakigkoordinar sa mga hingtungdang government agencies.

Adunay kinatibuk-ang 69 ka deklaradong ASEAN Heritage Parks (AHP) ang Southeast Asia, nga gilangkuban sa 47 terrestrial, 12 marine, ug 10 wetland AHPs, nga naglangkob sa mga 11.9 million hectares nga protected areas. -Ato ni Bai