Mga Thai Midangop sa Gold Leaf Rituals Alang sa Suwerte Taliwala sa Kalisod sa Ekonomiya

Naglingkod nga mapailubon ang daghang deboto sa Por Kae Ngoen Lan Park sa Ayutthaya — usa ka lugar nga nailhan sa tradisyon niini nga “drum-beating to call wealth” — samtang hinay-hinay nga natabonan ang ilang mga nawong sa naggilakgilak nga mga palid sa bulawan.

Sa ilang atubangan nahimutang ang estatwa ni Por Kae, ang hermit-sage nga gitahod sa tibuok Thailand isip batid sa karaang kaalam ug tigpanalipod sa mga nangita og suwerte. Tagsa-tagsa silang moduol aron ipapilit ang bulawan sa ilang agtang, aping ug suwang, hangtod nga daw nahimong bulawang maskara ang ilang mga nawong nga naggilak sa kahayag sa adlaw.

Ang ritual, nga gihimo sa 35-anyos nga ritual master nga si Tong Aek Banturaratchasi, nakadani og nagkadaghang tawo sa milabay nga mga bulan samtang nag-atubang ang ekonomiya sa Thailand sa hinay nga pagtubo, pagsaka sa mga gasto ug pagkunhod sa paggasto sa mga konsumidor. Alang sa daghang moadto sa park, ang gold leaf dili lamang dekorasyon; simboliko usab kini nga buhat aron mapalig-on ang kaugalingon.

“Applying gold leaf on the face is like boosting your own inner power,” matod ni Tong Aek, nga naghulagway niini isip pagpahayag sa pagtuo nga gituohang makahatag sa mga deboto og espesyal nga kaanyag ug grasya. Matod niya, ilabi kining popular sa mga negosyante ug gagmayng tag-iya og negosyo, nga nagtuo nga makatabang kini dili lamang sa pagpataas sa ilang kadasig kondili usab sa ilang suwerte.

Matod ni Tong Aek, ang pagsaka sa gidaghanon sa mga bisita nagpakita sa mas lawom nga kabalaka bahin sa ekonomiya nga gibati sa tibuok nasod. Iyang giingon nga kung mohinay ang negosyo ug mangawala ang mga kustomer, daghan ang modangop sa mga ritual sama niini isip paagi sa paghatag og kahupayan sa hunahuna ug espirituwal nga saligan panahon sa kawalay kasigurohan.

Alang sa maong mga deboto, ang pagbutang og bulawan sa ilang mga nawong dili lamang alang sa pagdani sa suwerte kondili aron mapasig-uli usab ang ilang pagsalig sa kaugalingon, nga naghimo sa park nga gitawag ni Tong Aek nga usa ka lugar nga kapahulayan sa hunahuna alang sa mga naningkamot nga mapadayon ang ilang panginabuhian.

Lakip sa mga deboto si Anong Puusap, 49, usa ka tag-iya og negosyo nga miingon nga ang iyang pagtuo sa ritual naggikan sa iyang kaugalingong kasinatian. Nahinumdom siya sa iyang unang pagbisita sayo niining bulana, diin bahin lamang sa iyang nawong ang gibutangan. Sa tungatunga sa bulan, matod niya, nadayon ang usa ka business deal nga dugay na niyang gipaningkamotan — hinungdan nga mibalik siya aron magpabutang karong higayona og gold leaf sa tibuok niyang nawong isip panalangin.

Tungod kay kombinsido siya sa gahum niini, nagdala siya og pipila ka higala aron ipaambit kanila ang iyang gituohang nakahatag kaniya og maayong kapalaran.

Lakip usab sa kanunay nga mobisita si Atchara Eimsaard, 35, nga miingon nga nakabalik na siya sa park upat o lima ka beses. Niining pagbisita, gipili niyang pabutangan og gold leaf ang tibuok niyang nawong sa wala pa maghulat nga wisikan og holy water isip panalangin, usa ka kasagarang kauban sa gold-leaf ritual nga gituohang makahinlo ug makahatag og dugang suwerte. Si Atchara, nga nagpadagan og made-to-order food stall, miingon nga plano niyang mobiyahe human sa seremonya, ug naglaom nga ang panalangin makatabang kaniya sa iyang umaabot nga biyahe ug mga transaksyon sa negosyo.

Samtang nagdilaab ang dagkong insenso ug nagpadayon ang mga deboto sa pagpilit og gold leaf sa estatwa ni Por Kae, makita sa maong talan-awon ang mas lapad nga uso sa Thailand: taliwala sa kalisod sa ekonomiya, daghan ang midangop dili lamang sa kugihan nga pagtrabaho kondili usab sa karaang mga ritual sa pagtuo nga gipraktis sulod sa daghang siglo — naglaom nga mobalik sa ilang pabor ang suwerte. -Ato ni Bai