Meghan Markle, gikonsiderar sa papel sa Netflix series ni Guy Ritchie

Posibleng mobalik sa acting si Meghan, asawa ni Britain’s Prince Harry, pinaagi sa usa ka papel sa Netflix series nga “The Gentlemen,” sumala sa mga taho sa media niadtong Biyernes.

Gitaho sa The Hollywood Reporter nga anaa na sa advanced talks ang duchess aron motungha sa ikatulong season sa series nga gimugna ni Guy Ritchie. Apan matod sa laing Hollywood publication nga Deadline, “hypothetical” pa ang mga panaghisgot tungod kay wala pa ma-renew ang show alang sa ikatulong season. Gikatakdang ipagawas sa sunod bulan ang ikaduhang season.

Miingon usab ang Deadline nga wala pay natino nga papel alang kang Meghan, nga mibida sa US cable TV drama nga “Suits” gikan 2011 hangtod 2018. Wala mokomento sa Reuters ang Netflix ug representante nila Meghan ug Harry.

Misunod ang mga taho sa wala damhang balita nga si Harry, nga mibiya sa iyang official duties niadtong 2020, mobalik uban ni Meghan ug sa ilang duha ka anak aron mopuyo sa Britain gikan sa ilang kasamtangang pinuy-anan sa California.

Gibituonan ni Theo James ang “The Gentlemen,” nga nagtutok sa usa ka lalaki nga wala damha nga nakapanunod sa country estate sa iyang pamilya, apan nadiskobrehan nga sentro kini sa usa ka dakong cannabis empire ug criminal underworld sa Britain. -Ato ni Bai