Love Bus mibalik sa Metro Manila, libre ang sakay

Mibalik sa Metro Manila ang Love Bus project, nga nagtanyag og libre ug mas komportableng biyahe isip kabahin sa paningkamot sa gobyerno nga makahatag og mas sayon nga public transport system, matod sa Malacañang niadtong Biyernes.

Gipahibalo ni Palace Press Officer Claire Castro ang pagbalik sa iconic Love Bus taliwala sa paningkamot ni President Ferdinand R. Marcos Jr. nga mapaayo ang public transportation sa Metro Manila.

Sa iyang pakigpulong sa mga reporter sa Philippine Embassy sa New Delhi, India, gipahayag ni Castro nga makasakay og libre ang mga commuter sa zero-emission electric buses.

“Ngayong taon, zero-emission electric buses na ang makikita sa daan na kayang magsakay ng 36 passengers bawat bus (This year, however, zero-emission electric buses will be deployed on the roads, each capable of carrying 36 passengers),” matod ni Castro.

Nanguna sila First Lady Liza Araneta-Marcos ug Metropolitan Manila Development Authority (MMDA) chairperson Don Artes sa pagbalik sa Love Bus niadtong Miyerkules.

Matod ni Castro, makasakay og libre ang mga pasahero gikan alas-6 sa buntag hangtod alas-9 sa gabii.

Mobiyahe ang mga bus gikan sa Robinsons Galleria sa Ortigas Business District ngadto sa pipila ka destinasyon, lakip ang MMDA headquarters, Arcovia City, C-5 ug Bridgetowne Estate sa Pasig City, ug Eastwood sa Quezon City, ug mobalik usab sa Robinsons Galleria.

“Muli, nais po nating bigyang-diin na si Pangulong Ferdinand R. Marcos Jr. at First Lady Liza Marcos ay hindi matatapos sa pagbibigay ginhawa sa ating mga commuters. So, para sa nais makaramdam ng pagmamahal, sakay na (Again, we would like to emphasize that President Ferdinand R. Marcos Jr. and First Lady Liza Marcos will continue working to provide relief to our commuters. So, if you want to feel the love, ride the bus),” matod ni Castro.

Unang gilunsad niadtong 1970s isip proyekto ni First Lady Imelda Marcos, ang Love Bus mao ang unang air-conditioned bus service sa nasod, nga nagtanyag niadtong panahona og modernong alternatibo sa mga jeepney ug regular nga bus.

-Ato ni Bai