Liza Soberano apil sa cast sa Amazon Audible nga ‘The Moons of LA’

Gipalapad ni Liza Soberano ang iyang Hollywood portfolio pinaagi sa bag-ong role sa “The Moons of LA,” usa ka comedy audio series sa Audible nga nagtigom sa dagkong Asian American actors, lakip nila Ken Jeong, Daniel Dae Kim, ug Randall Park.

Sumala sa Variety, ang bag-ong series adunay “a meta twist involving a kid who’s obsessed with true-crime podcasts and uses her investigative skills to save her parents’ marriage.”

Ang “The Moons of LA” usa ka coming-of-age comedy nga nagtutok sa pamilya, identity, ug personal success. Gisundan niini si Chloe Moon, usa ka middle school student nga nagdamgo nga mahimong investigative journalist. Tungod sa iyang kabalaka sa relasyon sa iyang mga ginikanan, gisugdan ni Chloe ang pag-interview sa mga paryente ug mga higala sa pamilya, ug gigamit ang iyang nahibaw-an aron masabtan kon unsay nahitabo ug mangitag paagi nga mahiusa pag-usab ang iyang pamilya.

Gidala ni Alyssa Abiera ang role ni Chloe, samtang wala pa gipadayag ang espesipikong role ni Soberano sa series.

Apil usab sa Korean American-led ensemble sila Jae Suh Park, Jimmy O. Yang, John Cho, Sherry Cola, Vivian Bang, ug Sydney Park.

Gipangulohan ni writer Paul Bae (“The Black Tapes”) ug director James Kim (“Moonface”) ang creative team luyo sa series. Executive producer usab si Kim kauban nila Jeong, John Cheng, Will Malnati, ug Ashley Taylor.

Co-produced ang proyekto sa Audible, 3AD, ug At Will Media.

“We've been lucky enough to bring together a stellar cast to tell a story that is both unique to the Korean American identity and universal in its exploration of the definition of personal success,” matod ni Kim sa Variety. “I'm grateful to 3AD, our entire creative team, and Audible for bringing it to life.”

Eksklusibong ipasalida ang “The Moons of LA” sa Audible, ang audio entertainment platform nga gipanag-iya sa Amazon, sa Oktubre 8.

Nakadugang ang proyekto sa nagkadaghan nga Hollywood credits ni Soberano, human sa iyang role sa “Lisa Frankenstein” ug sa Filipino-inspired animated feature sa DreamWorks nga “Forgotten Island,” nga iyang gipromote karon.

-Ato ni Bai