Korean stars, miuban kang Lee Chang-dong sa Venice premiere sa ‘Possible Love’

Mibalik sa Venice Film Festival niadtong Domingo, Setyembre 6, ang bantugang South Korean filmmaker nga si Lee Chang-dong alang sa premiere sa iyang bag-ong pelikula nga “Possible Love.”

Gibituonan ang drama sa mga iladong aktor nga sila Jeon Do-yeon ug Sul Kyung-gu.

Gidasig sa tinuod nga mga panghitabo, gisubay sa pelikula ang mga epekto sa dinagkong pagtangtang og mga trabahante sa usa ka dakong South Korean conglomerate niadtong 2009, nga misangpot sa dugay nga welga ug mapintas nga operasyon sa kapulisan nga nakapahinabo og trauma sa daghang trabahante.

Gisentro sa pelikula ang duha ka magtiayon, nga gidala nila Jeon, Sul, Cho Yeo-jeong ug Zo In-sung, kansang mga kinabuhi nagtagbo atol sa paghimo og pelikula bahin sa mga trabahanteng natangtang sa trabaho.

Gidala ni Jeon ang papel sa asawa sa usa ka kanhi trabahante nga naningkamot sa pag-atubang sa mga epekto sa panagbangi ug nagpas-an sa emosyonal nga kabug-at sa nasinati sa ilang pamilya.

Espesyal alang kang Lee ang Venice Film Festival, diin ang iyang 2002 drama nga “Oasis” nakapadaog kaniya sa Silver Lion alang sa best director.

Usa ang “Possible Love,” nga gipili sa South Korea isip entry niini sa Oscars sa sunod tuig, sa 21 ka pelikulang nagkompetensya alang sa Golden Lion sa Venice Film Festival. -Ato ni Bai