Inka Magnaye nabalaka human nawad-an og voice-over job ang iyang inahan tungod sa AI

Gipahayag sa content creator ug voice talent nga si Inka Magnaye ang iyang kabalaka sa nagkadakong hulga sa artificial intelligence (AI) sa mga trabaho sa creative industry human mawad-an og voice-over job ang iyang inahan nga si Lindy Pellicer, usa ka beteranong voice talent, tungod sa maong teknolohiya.

“My heart breaks for all the artists and creatives,” matod ni Inka sa iyang social media post niadtong Huwebes, diin iyang giapil ang screenshot sa mensahe sa iyang inahan ngadto sa ilang pamilya nga nag-ingon, “I just lost a voice over job to AI.” Gisulayan sa igsoon nga lalaki ni Inka nga hupayon ang ilang inahan, ug miingon nga posibleng tungod sa limitadong budget ang maong desisyon.

Wala nganli ni Inka ang kliyente apan gihulagway niya kini nga usa ka dakong brand.

Bisan og nasabtan ni Inka nga adunay kaugalingong interes ang mga negosyo nga angay konsiderahon, giawhag niya ang mga kompanya nga hunahunaon ang epekto sa pagpili sa AI imbes nga mga tawo.

Gihagit niya ang dagkong brand nga hunahunaon kon gusto ba nila ang kaugmaon diin ang teknolohiya mogamit sa mga kahinguhaan sa kalibotan samtang nagkuha sa mga oportunidad sa mga tawo.

“Is that the future you want? A world where numbers, codes, and programs syphon the earth’s resources and take opportunities from actual human beings?” pangutana niya.

Gipunting usab ni Inka nga ang kuwarta nga matigom sa mga kompanya pinaagi sa paggamit sa AI mahimong makadaot sa mga tawo nga nagsuporta sa ilang mga negosyo.

“Sure, you save money. But the money you would have spent on the real people who would love to work with you will end up spending this money back on you anyway. We are your customers, too,” matod niya.

Gipasiugda usab niya nga ang AI angay gamiton isip himan ug dili ipuli sa talento sa tawo. Matod niya, ang mga content nga gihimo sa AI kulang sa kinabuhi ug tinuod nga pagbati nga makita sa mga buhat sa tawo.

“AI VOs sound lifeless. AI art feels lifeless. AI music sounds lifeless. Why? Because AI is not alive,” matod niya. “It can never replicate life. And we are slowly being backed into a dead world one prompt at a time.”

Gitapos ni Inka ang iyang post pinaagi sa pag-awhag sa mga brand ug kompanya nga kuhaon ang iyang inahan alang sa voice-over job: “If any brands or companies out there want to hire an amazing voice-over artist, my mom’s schedule just freed up.”

Nagpasalamat si Lindy sa suporta sa iyang anak apan miangkon nga labi siyang nasubo ug nasagmuyo sa pagkawala sa trabaho tungod kay dugay na siyang nagtrabaho alang sa maong kliyente.

“It’s a sad and frustrating day for me because I’ve been doing voice work for them for many years! This is the day I dreaded most!” matod ni Lindy.

Bisan sa iyang kasagmuyo, nagpabiling malaumon si Lindy ug misalig sa Diyos nga hatagan siya og bag-ong mga oportunidad sa trabaho.

“Now that it’s here, I can only trust God to get me gigs. He is my full-time booking agent!”

Ang kasinatian ni Lindy nahitabo taliwala sa nagkadakong kabalaka sa mga artist ug creative professional nga posibleng mopuli ang AI sa mga trabahante ug makapakunhod sa mga oportunidad sa trabaho sa maong industriya.

Si Inka ug Lindy parehong iladong mga voice talent nga nakatrabaho na sa mga commercial campaign ug advertisement sa lainlaing brand.

-Ato ni Bai