Grabeng Kainit Nagdasig sa mga Lalaki Gikan Tokyo Hangtod London nga Mag-Shorts sa Trabaho

Nagdala ang grabeng kainit sa ting-init og kausaban nga wala mahimo sa daghang tuig nga mas luag nga dress code — mas daghan nang lalaki ang mosulod sa opisina nga naka-shorts.

Nanguna niini ang Tokyo, Japan. Karong tuiga, gipalapad sa metropolitan government ang dugay na nitong “Cool Biz” campaign nga walay tie ug jacket pinaagi sa pagdasig sa mga empleyado nga dili na magsul-ob og taas nga karsones, ug mosulay usab og T-shirts ug sneakers.

Samtang nagkagrabe ang heatwaves sa tibuok Europe, misunod usab ang ubang mga trabahante sa nahitabo sa Tokyo, usahay uban sa pagdasig sa mga awtoridad ug management, ug usahay sa ilang kaugalingong desisyon.

Nagkahanaw ang Kalainan sa Sinina sa Trabaho ug Bakasyon

Miingon ang dagkong retailers sa Reuters nga kusog ang halin sa linen shorts ug suits sa Britain, samtang mas daghang lalaki ang mipili og gaan ug preskong mga tela nga kasagarang makita sa mga lugar nga adunay klima sama sa Mediterranean.

“The lines between ‘commuter’ and ‘holiday’ style are blurring,” matod ni Martha Hibberd, menswear buyer sa British department store nga John Lewis.

Miingon ang Marks and Spencer MKS.L nga misaka og 183% ang halin sa men’s linen trousers gikan Hunyo hangtod Hulyo kumpara sa samang panahon sa miaging tuig.

Miingon ang H&M HMb.ST — usa sa kinadak-ang fashion retailers sa Europe — nga nagpasulod kini og mas gaan nga mga sinina ug giuswag sa ulahing bahin sa tuig ang pagpagawas sa mga sinina alang sa tingdagdag.

“It looks like we’re not going back when it comes to climate change,” matod ni Andreas Lowenstam, head of menswear design sa H&M.

Miingon ang Hugo Boss nga gidugangan niini ang kapilian sa tailored shorts. Ang “Boss by Beckham” collection niini kauban ang soccer star nga si David Beckham nagtanyag og cotton tailored shorts nga nagkantidad og €229 ($267.27).

‘Shorts Are for Weekends’

Makita ang maong uso sa dagkong sentro sa negosyo sa Europe, gikan sa Canary Wharf sa London hangtod sa mga kadalanan sa Frankfurt. Apan adunay gihapoy mga limitasyon.

Sa DNB, ang kinadak-ang bangko sa Norway, gitugotan ang mga empleyado nga magsul-ob og shorts ug skirts, matod sa spokesperson nga si Vidar Korsberg Dalsbo sa Reuters.

“However, we are probably talking about smarter garments with some length rather than a ballerina skirt or a cheeky pair of 1970s-style soccer shorts.”

Niadtong Hunyo, nagpadala og email si Gianfranco Lot, Switzerland head sa insurance group nga Swiss Re SRENH.S, ngadto sa mga empleyado nga adunay mga tambag aron makapresko panahon sa kainit.

Kauban sa mga sugyot — sama sa pag-inom og tubig, pagpahulay kung gikinahanglan, ug paglangoy sa Lake Zurich nga atbang lamang sa opisina — adunay mubo nga pahinumdom nga “shorts are for weekends”.

Apan adunay mga timailhan nga pipila ka trabahante andam nga supakon ang naandan nga dress code aron makasul-ob og mas gaan nga sinina.

Miingon sa Reuters ang kinadak-ang union sa Germany nga IG Metall ug services sector union nga Verdi nga ang dress code kinahanglan paluagon o temporaryong dili ipatuman kung gikinahanglan panahon sa grabeng kainit.

“Summers are getting hotter, heat waves are becoming more frequent, and the strain on workers is noticeably increasing,” matod ni Moriz Tiedemann, occupational health expert sa IG Metall.

Ang uban naghimo na mismo og paagi.

Sa Warsaw, usa ka bus driver ang gikapoy na sa naandang uniporme nga taas nga polyester nga karsones ug misulod sa trabaho nga naka-skirt usa ka adlaw ning bulana isip protesta.

“These materials make us sweat and overheat,” matod sa lalaki, nga Darek lamang ang iyang gipaila nga ngalan.

Sa kataposang ihap, kapin 400 na ang mipirma sa petisyon nga gisugdan sa usa sa iyang mga kauban, nga naghangyo sa transport authority sa Polish capital nga ZTM nga tugotan ang mga driver nga magsul-ob og shorts panahon sa init nga panahon. -Ato ni Bai