Gaza Documentary sa Oscar-Winning Team Giapil sa Venice Film Festival

Giapil niadtong Lunes sa Venice Film Festival ang usa ka documentary nga nagsusi sa pagpatay sa Israel sa mga sibilyan sa Gaza, nga maoy ikaduhang sunod nga tuig nga usa ka kontrobersyal nga obra bahin sa panagbangi ang makigkompetensya alang sa prestihiyosong Golden Lion.

Miingon ang mga organizer sa festival nga ang “NAZA”, nga gidirekta sa Israeli duo nga sila Yuval Abraham ug Rachel Szor, maapil sa main programme sa kalihokan gikan Septiyembre 2 hangtod 12 — ang bugtong documentary taliwala sa 21 ka mga entry karong tuiga.

Niaging tuig, nakadaog og ikaduhang premyo sa Venice ang “The Voice of Hind Rajab”, nga nagsaysay sa makalilisang nga kataposang mga oras sa usa ka batang babaye gikan sa Gaza nga natanggong sa sakyanan samtang gipusil sa Israeli forces. Nakadawat kini og rekord nga 23 minutos nga standing ovation sa premiere niini.

Sumala sa synopsis nga gipagawas sa festival, ang “NAZA” gi-shoot sa gabii ibabaw sa mga atop sa Tel Aviv ug “reveals in detail the systems behind Israel’s calculated mass killing of Palestinian civilians in Gaza”.

Matod sa Palestinian health authorities, kapin 73,000 ka tawo ang namatay sa Gaza human gilunsad sa Israel ang military campaign niini batok sa coastal enclave niadtong Oktubre 2023, human sa pag-atake sa Hamas sa Israel nga nakapatay og mga 1,200 ka tawo, sumala sa ihap sa Israel.

Wala gilain sa Gaza health ministry sa ihap niini ang mga sibilyan ug mga fighter. Miingon ang Israel nga ang opensiba niini gitumong batok sa Hamas ug naningkamot kini nga malikayan ang pagpatay sa mga sibilyan, apan matod niini, nagtago ang grupo taliwala sa mga sibilyan, usa ka pahayag nga gipanghimakak sa Hamas.

Sila Abraham ug Szor duha sa upat ka co-director sa “No Other Land”, nga nakadaog sa Academy Award alang sa best documentary feature niadtong 2025. Gisaysay sa maong salida ang pagkaguba sa usa ka Palestinian community sa Israeli-occupied West Bank ug ang padayon nga pagpalapad sa Jewish settlements.

Ang “NAZA” gihimo sa Britain’s Guardian newspaper ug James Wilson, samtang si Jonathan Glazer, ang Oscar-winning director sa 2023 Holocaust drama nga “The Zone of Interest”, maoy executive producer.

Sila Wilson ug Glazer mao usab ang producer ug executive producer sa “The Voice of Hind Rajab”. Niaging semana, giablihan sa Israeli authorities ang usa ka criminal investigation sa pagkamatay sa batang babaye.

Ipasalida sa unang higayon ang “NAZA” sa Venice sa Septiyembre 10. Apil kini sa mga entry karong tuiga uban sa bag-ong mga obra nila Martin McDonagh, Florian Zeller, Danny Boyle, Werner Herzog, ug Hirokazu Kore-eda. -Ato ni Bai