Filipino American Actor Dave Bautista Bag-ong Kratos sa ‘God of War’

Napili ang Filipino American actor nga si Dave Bautista sa papel ni Kratos sa live-action adaptation sa Prime Video sa sikat nga video game franchise nga “God of War.”

Si Bautista, nga nailhan sa iyang papel isip Drax sa Marvel’s “Guardians of the Galaxy” films ug Beast Rabban sa “Dune” franchise, maoy manguna sa series isip bantugang Spartan warrior. Gitaho sa Variety niadtong Huwebes ang iyang pagkapili, human sa unang mga taho nga gikonsiderar siya alang sa papel.

Ilisan niya si Ryan Hurst, nga unang gipahibalo isip Kratos niadtong Enero. Naangol si Hurst sa bicep samtang nag-shooting, nga nagkinahanglan og operasyon ug gilaum nga makapalangan og dugay sa produksyon. Sa kataposan, nakadesisyon ang Amazon ug Sony, nga magkauban sa paghimo sa series, nga ihatag kang Bautista ang papel imbis maghulat nga maulian si Hurst.

Nagsugod ang produksyon sa Vancouver niadtong Pebrero ug gilaum nga ipadayon sa umaabot nga mga semana uban kang Bautista isip bida. Kinahanglan usab nga kuhaan pag-usab ang mga eksena nga giapilan ni Hurst.

Daghan og kasinatian si Bautista, 57, alang sa papel nga nagkinahanglan og kusgan nga panglawas ug lisod nga mga eksena sa aksiyon.

Sa wala pa mosulod sa Hollywood, professional wrestler si Bautista nga nailhan isip Batista ug sukad niadto nakatukod og malampusong karera sa pag-arte. Nakatrabaho na usab siya kaniadto sa Prime Video sa “The Wrecking Crew,” diin kauban niya si Jason Momoa.

Alang sa mga Filipino, adunay personal nga koneksyon ang pagkapili kang Bautista. Anak siya sa usa ka Filipino nga amahan ug inahan nga Greek ang kaliwat, ug dugay na niyang mapasigarbohong gihisgutan ang iyang Filipino roots. Makita sa iyang mga tattoo ang duha ka bahin sa iyang kaliwat, lakip ang mga bandera sa Pilipinas ug Greece sa iyang wala nga bukton, ingon man ang tulo ka bituon ug adlaw gikan sa bandera sa Pilipinas.

Mas milalom ang iyang koneksyon sa Pilipinas human sa iyang pagbisita sa nasud uban sa World Wrestling Entertainment (WWE) niadtong 2006. Miingon si Bautista nga ang mainitong pagdawat kaniya sa mga Filipino fans atol sa maong pagbisita nakapalig-on sa iyang koneksyon sa iyang Filipino heritage.

Makauban ni Bautista ang una nang gipahibalo nga cast, lakip sila Callum Vinson, Max Parker, Sherilyn Allen, Teresa Palmer, Mandy Patinkin, Alastair Duncan, Danny Woodburn, ug Ed Skrein.

Ang “God of War” series nagtuyok kang Kratos, usa ka kusgan nga warrior nga nailhan sa iyang maskuladong lawas ug mga pakig-away batok sa mga diyos ug mga nilalang sa mitolohiya. Makauban ni Bautista si Vinson, nga maoy modala sa papel ni Atreus. -Ato ni Bai