Ed Sheeran Nangayo og Pasaylo sa Isyu kang Macklemore

Nangayo og pasaylo niadtong Sabado si pop star Ed Sheeran sa iyang pagdumala sa kontrobersiya nga mitumaw karong semanaha human gitangtang si rapper Macklemore isip opening act tungod sa iyang mga komento bahin sa Palestine.

Sa iyang unang pagpahayag bahin sa isyu, gikondena sa British singer ang pagtratar sa Israel sa mga residente sa Gaza isip “unjustifiable.”

“I’ve had to take and make difficult decisions and I am making mistakes and I’m so, so sorry,” matod ni Sheeran ngadto sa mga tumatan-aw sa Philadelphia, diin siya mitukar sa unang higayon sukad gitangtang si Macklemore sa concert tour.

Sa pagsugod sa concert sa Lincoln Financial Field, gihulagway ni Sheeran nga “horrific” ang pag-atake sa Hamas niadtong Oktubre 2023 nga nakapatay og 1,200 ka Israelis. Apan gihulagway niya nga “catastrophic and unjustifiable and disproportionate” ang misunod nga gubat sa Israel, nga nakapatay og liboan sa Gaza ug nakapahawa sa halos tanang populasyon gikan sa ilang mga pinuy-anan.

Gikondena usab ni Sheeran ang “systemic injustice” sa West Bank, diin gitugotan sa right-wing coalition government sa Israel ang dakong pagpalapad sa Jewish settlements.

Ang pangbukas nga pahayag sa pop star niadtong Sabado dakong kausaban gikan sa iyang mga pahayag sayo ning semanaha, sa dihang nag-post si Sheeran sa Instagram nga ang mga tumatan-aw sa iyang mga concert “do not expect a political forum.”

Nagpadayon ang kontrobersiya palibot kang Sheeran sukad nag-post si Macklemore sa Instagram nga gisultihan siya sa New England Patriots owner nga si Robert Kraft nga dili siya tugotan nga motukar sa Gillette Stadium sa Foxborough, Massachusetts, diin adunay mga concert si Sheeran sa Setyembre 25 ug 26.

Matod ni Macklemore, gisultihan siya ni Kraft ug ubang mga tag-iya sa stadium nga dili tugotan si Sheeran nga motukar sa ilang mga venue kon magpabilin si Macklemore sa tour human siya miingon og “Free Palestine” atol sa concert niadtong Setyembre 4 sa MetLife Stadium sa East Rutherford, New Jersey. Human niini, mibiya usab ang ubang supporting acts sa tour isip pagpakita og pakighiusa kang Macklemore.

Bisan pa sa pagsunod sa gipangayo sa mga tag-iya sa stadium nga tangtangon si Macklemore, miingon si Sheeran niadtong Sabado nga “deeply worried” siya sa pag-usisa sa mga concert venue sa content sa mga performer. “This happens in so many places that I perform around the world, but it should never happen in the free world,” matod ni Sheeran.

Apan wala kaayo maapektuhan sa kontrobersiya ang mga tawo nga nakaistorya sa Reuters niadtong Sabado sa wala pa misaka si Sheeran sa entablado.

Miingon si Joy VanRuler, usa ka 55-anyos nga magtutudlo gikan sa Pottstown, Pennsylvania, nga gisuportahan niya ang duha ka artists.

“It doesn’t need to be political,” matod ni VanRuler sa usa ka interview gawas sa stadium sa Philadelphia. “It’s about the music, and we support both of them and it’s all good.”

Macklemore “shouldn’t have talked about politics,” matod ni Javier Hernandez, usa ka 62-anyos nga designer gikan sa Allentown, Pennsylvania, nga giimbitar sa iyang anak nga babaye sa concert. “It gives the people an opportunity to raise their voices and just make a mess of the whole situation. He should have just left it alone.”

Dose-dosenang pro-Palestinian protesters ang nagtapok mga tunga sa milya gikan sa concert venue sa wala pa ang performance ni Sheeran. Matod sa mga organizer, atua sila aron makig-estorya sa mga tawo bahin sa kahimtang sa Gaza ug aron ipasiugda ang mga lokal nga grupo nga nagbarog alang sa mga Palestinian. -Ato ni Bai