Concert ni Jona Makatabang sa Animal Welfare Advocacy sa Pilipinas

Mosuporta ang “Jona Chapters,” ang pinakabag-ong solo concert sa singer-songwriter nga si Jona, sa iyang animal welfare advocacy sa spaying ug neutering sa mga iro ug iring.

Ipahigayon ang show sa Nobyembre 14 sa New Frontier Theater sa Quezon City, usa ka adlaw sa wala pa ang ika-37 nga birthday ni Jona, nga naghimo niini nga usa ka selebrasyon pinaagi sa musika ug paagi sa paghatag og tabang sa usa ka adbokasiya nga duol sa iyang kasingkasing.

Sa usa ka Facebook post, gipatin-aw ni Jona nganong importante ang spaying ug neutering. “Every life deserves a better chapter,” matod niya.

“Beyond the music and celebration, this concert will help support our spay and neuter advocacy – one of the most important ways that can make a difference in the lives of animals, helping prevent unwanted litters, reduce animal homelessness and suffering before it even begins.”

Ang spaying mao ang surgical nga pagtangtang sa ovaries, ug kasagaran apil ang uterus, sa babayeng hayop aron dili kini mabuntis. Ang neutering, sa laing bahin, mao ang pagtangtang sa testicles sa laki nga hayop aron dili kini makapaanak og mga itoy o kuting.

Gawas sa pagtabang sa pagkontrol sa gidaghanon sa mga hayop nga walay tag-iya, makatabang usab kini nga mga pamaagi sa panglawas sa mga binuhi sa paglabay sa panahon. Ang mga hayop nga na-sterilize mahimong mabuhi og mas taas ug mas himsog pinaagi sa paglikay sa pipila ka sakit sa reproductive system. Ang spaying ug neutering mahimo usab nga makatabang sa pagpugong sa grabeng mga impeksyon ug pagpaubos sa risgo sa pipila ka matang sa cancer.

Pangulohan ni Frank Lloyd Mamaril ang show, samtang si Bobby Velasco ang musical director. Anaa na ang mga ticket sa Ticketnet online, nga nagkantidad gikan ₱900 hangtod ₱5,800, gikan sa Balcony hangtod SVIP.

Nagsugod si Jona sa pagluwas og mga iro ug iring nga walay tag-iya niadtong 2009. Nagtukod siya og pribadong animal sanctuary sa tulo ka ektaryang farm sa Tanay, Rizal. Puy-anan na karon ang lugar sa mga 70 ka naluwas nga iro ug iring, samtang ang pipila sa iyang mga naluwas nga hayop gisagop na sa bag-ong mga pamilya.

Una nga nailhan si Jona, kansang tibuok ngalan mao si Jonalyn Viray, human modaog sa singing contest nga ‘Pinoy Pop Superstar.’ Sa ulahi, nahimo siyang lead singer sa girl group nga La Diva sa wala pa mopadayon sa solo career.

Lakip sa iyang mga kanta ang “Maghihintay Ako,” “Help Me Get Over,” ug “Ano Nga Ba Tayo.” Nahimong popular ang iyang cover sa “Pusong Ligaw” ni Jericho Rosales ug ang iyang revival sa “You” ni Basil Valdez.

Ang iyang kanta nga “Pusong Ligaw” nahimong opening theme sa television series nga parehas og ngalan, samtang ang “You” nahimong official theme sa romance film nga “My Ex and Whys.” -Ato ni Bai