Celine Dion Gihugyaw sa Paris sa Pagbalik sa Entablado Human sa Unom ka Tuig

Mibalik si Celine Dion sa entablado nga puno sa emosyon human sa unom ka tuig nga pagkawala niadtong Sabado, diin iyang nabuntog ang seryosong mga problema sa panglawas aron lipayon ang mga fans sa unang bahin sa sunod-sunod niyang mga concert sa Paris.

“I’m standing on stage in this city I love so much thanks to your support and your love,” matod niya sa mga tumatan-aw. “The path was rocky, the road was longer than planned but I held on.”

Gipahibalo sa sikat nga singer niadtong 2022 nga nadayagnos siya og stiff person syndrome, usa ka talagsaong neurological condition nga hinungdan sa muscle spasms ug nakapugong kaniya sa pag-perform.

Daw nabug-atan sa emosyon si Dion usahay ug mihilak atol sa iyang opening number, diin iyang gitunol ang mikropono ngadto sa mga tumatan-aw aron tabangan siya sa pagkanta sa bridge.

“I promised I wouldn’t cry - but they’re tears of joy,” matod niya, nga kasagarang nagsulti og French sa tibuok concert.

Simple ang staging ug kasagarang nagsul-ob si Dion og sunod-sunod nga itom nga gowns, nga naghatag og dakong pagtagad sa iyang klarong emosyon sa iyang pagbalik sa atubangan sa mga tumatan-aw.

“She didn’t shy away from what she suffered and she shared it with her audience,” matod sa British fan nga si Catherine Rushforth samtang mibiya siya sa arena sa Nanterre sa gawas sa Paris.

Kompyansang gipakita ni Dion ang iyang naandang mga lihok sa entablado, lakip ang paghimo og nagkalainlaing ekspresyon sa nawong ug pagpakaaron-ingnon nga naggitara, samtang kusog niyang gikanta ang mga ballad lakip ang “My Heart Will Go On” ug “All By Myself” nga nakatabang kaniya nga mahimong usa sa labing daghang nabaligyang recording artists sa tanang panahon.

Apan iyang gisugdan ang concert pinaagi sa usa sa iyang pinakasikat nga French-language hits nga “On Ne Change Pas” (“We Don’t Change”) — nga daw nagtumong sa iyang dugay nga pagkawala sa entablado.

Ang iyang 16-concert residency, uban sa dugang 10 ka dates sa 2027, nakapukaw og dakong kahinam sa French capital, diin magtapok ang mga tawo sa gawas sa iyang mahalong hotel hangtod kadlawon sa paglaom nga makakita kaniya.

“Her fight is an example for all of us, it’s wonderful,” matod sa fan nga si Julien Faruch, usa ka chef. -Ato ni Bai