'Buy Local, Be Vocal' trade fair sa Region 12 ipahigayon sa BGC

Gitinguha sa mga awtoridad nga makaabot sa P30 milyon ang halin sa Treasures of Region 12: Buy Local, Be Vocal trade fair karong tuiga, nga ipahigayon gikan Huwebes hangtod Domingo ning semanaha sa Market! Market! sa Bonifacio Global City.

Sa pakighinabi sa Bagong Pilipinas Ngayon niadtong Martes, miingon si Eddie De Asis, officer-in-charge provincial director sa DTI Sultan Kudarat, nga mga 70 ka micro, small and medium enterprises (MSMEs) ang moapil sa kalihokan karong tuiga. Ikatulo na kini nga higayon nga ipahigayon ang trade fair sa Metro Manila.

Matod niya, mas daghan kini kumpara sa 60 ka exhibitors sa miaging tuig. Lakip sa mga produktong ipasundayag ang kape ug tsokolate gikan sa Sultan Kudarat, mga produkto nga T’nalak gikan sa South Cotabato, ug mga produktong agrikultural gikan sa ubang lugar sa rehiyon.

Ang mga MSME nga moapil gikan sa upat ka probinsya ug mga siyudad sa Soccsksargen, nga mao ang Koronadal City, General Santos City, Tacurong City, Kidapawan City, South Cotabato, North Cotabato, Sultan Kudarat, ug Sarangani.

Matod ni De Asis, ang mga negosyanteng moapil nakahuman sa Kapatid Mentor ME program sa DTI, usa ka programa nga nagtumong sa pagtabang sa mga tag-iya sa MSME nga mapalambo ang ilang kahanas sa pagpadagan ug pagdumala sa negosyo ug makasulod sa mas daghang merkado.

“Libre po ang pagpasok sa Treasures of Region 12, basta bumili lang po kayo,” matod niya. -Ato ni Bai