top of page
Bai (150 x 150 px) (100 x 100 px).png

British Adventurer Makauli na Human sa 28 ka Tuig nga Paglakaw Libot sa Kalibotan

Gilaumang mahuman na karong Lunes ang hapit tulo ka dekada nga paglakaw libot sa kalibotan sa usa ka British adventurer, nga motapos sa iyang 31,000 ka milya nga panaw sa balay diin siya nagdako.

Temilade Adelaja / Reuters; Gihubad ni Alex Destor / Ato ni Bai

November 5, 2026 at 3:14:59 PM

Si Karl Bushby nga nagtudlo samtang gilibotan sa mga tawo ug media nga nagkuha og video ug litrato.

Nakabalik sa iyang hometown sa Hull, Britain, ang explorer nga si Karl Bushby human sa 28 ka tuig nga paglakaw libot sa kalibotan, Nobyembre 2, 2026.

Reuters / Temilade Adelaja

Gilaumang mahuman na karong Lunes ang hapit tulo ka dekada nga paglakaw libot sa kalibotan sa usa ka British adventurer, nga motapos sa iyang 31,000 ka milya nga panaw sa balay diin siya nagdako.


Miagi si Karl Bushby sa mga kalasangan sa Central America, mitabok sa nagyelong kadagatan tali sa Alaska ug Russia, ug niadtong miaging bulan milangoy tabok sa English Channel isip kataposang bahin sa iyang panaw nga gihimo gamit lamang ang kaugalingong kusog.


Gisugat sa gatusan ka mga tawo nga naglipay ug nagpakpak ang 57 anyos nga adventurer sa plasa sa iyang lungsod nga Hull niadtong Lunes sa buntag.


"After 28 years, you just couldn't ask for more than this," matod niya sa mga tawo, sa wala pa mopadayon sa paglakaw samtang nagduso sa kariton nga adunay pipila niyang mga gamit ug usa ka reserbang ligid sa ibabaw nga dili na niya kinahanglan gamiton.


"I guess I'll be seeing you around," dugang niya. Human niini, mipadulong siya sa balay sa iyang pamilya diin naghulat ang iyang inahan, 36 anyos nga anak nga lalaki, ug 12 anyos nga apo nga babaye.


Nagserbisyo si Bushby sa Parachute Regiment sa British Army sa dihang naa pa siya sa edad nga 20 hangtod 29 anyos. Human mabungkag ang iyang kaminyoon, nagdrowing siya og linya sa mapa sa kalibotan ug nagsugod sa iyang panaw, nga nadasig sa pangutana sa iyang amahan kon posible bang lakwon ang gilay-on gikan sa London hangtod New York.


Nagdalag tolda, pipila ka gatos ka dolyar, ug baratuhong plastik nga kamera, gisugdan niya ang panaw sa Chile ug mipadulong sa amihanan agi sa mga nasud sa Americas. Mitabok siya gikan sa Alaska paingon sa Russia, Mongolia, ug China, sa wala pa mibalik agi sa Europe human langoyon ang Caspian Sea.


"Sometimes the monotony is incredible. You're in deserts and the landscape doesn't change for days to weeks. That can get a little mind-bending. The same with the Arctic," matod niya sa Reuters niadtong miaging tuig.


Sa sinugdan, nagtuo si Bushby nga mokabat lamang og 10 ka tuig ang iyang panaw, apan wala niya damha ang daghang kalisdanan nga iyang maatubang. Lakip niini ang iyang temporaryong pagkabilanggo sa Panama, ang paghulga kaniya gamit ang pusil sa Mexico, ug ang iyang pagkadakop sa mga awtoridad sa Russia tungod sa ilegal nga pagtabok sa utlanan. Nadugangan pa ang kalangan sa iyang panaw tungod sa krisis sa pinansiya niadtong 2008 ug sa pandemya sa COVID.


"This is what an odyssey in the 21st century looks like," matod niya sa Telegraph newspaper. "Half of it is literally dealing with these bureaucratic geopolitical problems, not just the environmental hurdles. There are some times where the solution is just to wait.”


Gisultihan ni Bushby ang BBC nga sa 28 ka tuig sa iyang panaw, mga 15 ka tuig lamang ang iyang aktuwal nga gigugol sa paglakaw. Matag karon ug unya, mibalik siya sa Mexico aron asikasuhon ang iyang mga visa, mga kinahanglanon sa pagbiyahe, ug mga kasabutan sa sponsorship sa mga kompanya ug media.


Gihimo na karon ang usa ka taas nga dokumentaryo bahin sa iyang panaw, samtang nagplano usab si Bushby nga maglibot sa England sa umaabot nga mga semana aron ipaambit ang iyang mga kasinatian.


-Temilade Adelaja / Reuters; Gihubad ni Alex Destor / Ato ni Bai

bottom of page