Bollywood hit ‘3 Idiots’ adunay sequel

Gikumpirma ni director Rajkumar Hirani nga gihimo na ang sequel sa 2009 Bollywood blockbuster nga “3 Idiots,” hapit duha ka dekada human gipagawas ang unang pelikula, ug kasamtangang gisulat pa ang istorya ug script niini.

Sumala sa The Times of India, gibutyag ni Hirani sa bag-ohay nga interview nga anaa pa sa writing stage ang proyekto.

“Once it reaches the right point, we will talk about it. Right now, we are still writing,” matod niya. “[The] casting will be the same,” dugang niya.

Kon madayon ang sequel, posibleng mobalik sila Aamir Khan, R Madhavan ug Sharman Joshi sa ilang mga papel isip Rancho, Farhan ug Raju.

Apan wala nagsugod ang ideya sa sequel isip pagpadayon sa “3 Idiots.” Sa samang report, gipasabot ni Hirani nga mitumaw ang konsepto samtang siya ug ang iyang team nagtrabaho sa lahi nga istorya.

Gipaambit usab ni Hirani ang pipila ka detalye sa mahimong dagan sa sequel. Dili na niini ipakita sila Rancho, Farhan ug Raju isip mga estudyante sa kolehiyo. Hinuon, sundon sa istorya kung giunsa pagbag-o ang ilang kinabuhi mga duha ka dekada human sa unang pelikula.

Bisan daghan ang nagpaabot sa posibleng sequel, gipasiugda ni Hirani nga dili nila dalion ang proyekto tungod lamang kay dakong kalampusan ang unang pelikula. Padayon pang gihimo ang istorya ug gusto sa team nga hatagan kini og igong panahon.

Gipagawas niadtong 2009 ang “3 Idiots,” nga nagsunod sa tulo ka engineering students kansang panaghigalaay mas milig-on samtang ilang giatubang ang grabeng academic pressure ug mga expectation nga gibutang kanila.

Nakatabang ang memorable nga mga karakter, emosyonal nga istorya, ug kombinasyon sa comedy, drama, coming-of-age ug social commentary aron mahimong dakong international success ang pelikula.

Naka-relate usab ang mga manan-aw sa tibuok kalibotan sa paghisgot niini sa edukasyon ug pressure nga giatubang sa mga estudyante, samtang nahimong paborito sa fans ang soundtrack niini, lakip ang sikat nga “Aal Izz Well” (All Is Well).

Makita usab ang dugayng epekto sa pelikula sa mga award nga nadawat niini. Sa 2010 Awards of the International Indian Film Academy (IIFA), nakadaog ang “3 Idiots” og Best Film, samtang nakadaog si Hirani og Best Director ug si Sharman Joshi sa Popular Award for Best Actor in a Supporting Role, uban sa ubang mga award. -Ato ni Bai