top of page
Bai (150 x 150 px) (100 x 100 px).png

Bea Alonzo Gidungog-Dungog nga Buntis Human sa Iyang Birthday Video

Gidungog-dungog na usab nga posibleng buntis ang aktres ug negosyanteng si Bea Alonzo human makadani sa atensiyon sa mga netizen ang video sa iyang bag-ong selebrasyon sa adlawng natawhan.

Kim Asis / Paraluman News; Gihubad ni Alex Destor, Ato ni Bai

October 23, 2026 at 3:29:16 PM

Si aktres Bea Alonzo nga nag-pose alang sa usa ka hulagway samtang nagsandig sa bintana sa sakyanan.

Mga hungihong bahin sa pagmabdos, sa ikaduhang higayon. (Screen grab sa hulagway gikan sa Instagram account ni Bea Alonzo.)

Instagram account ni Bea Alonzo

Gidungog-dungog na usab nga posibleng buntis ang aktres ug negosyanteng si Bea Alonzo human makadani sa atensiyon sa mga netizen ang video sa iyang bag-ong selebrasyon sa adlawng natawhan.


Nagsaulog si Bea sa iyang ika-39 nga adlawng natawhan niadtong Sabado, Oktubre 17, diin daghang fans ang nagbilin og komento sa video nga gi-upload sa iyang fan page sa Instagram.


Taliwala sa mga pangumusta ug pagbati sa iyang fans, adunay mga netizen nga nangutana kon buntis ba ang aktres base sa ilang nakita sa iyang panagway.


“Buntis ba si Bea? Yung mukha niya parang buntis,” komento sa usa ka netizen. Samtang ang lain miingon, “She looks pregnant I can tell by the nose.”


“Bakit hindi nagpapakita ng tiyan si idol,” pangutana sa laing netizen, nga gitubag usab sa usa nga miingon, “She’s not yet pregnant.”


Samtang niini, adunay ubang nakakita sa video nga miingon nga "blooming" ang hitsura ni Bea.


Makita sa video si Bea nga nagsaulog sa iyang adlawng natawhan kauban ang iyang bana nga negosyanteng si Vincent Co, mga higala, ug mga minahal sa kinabuhi.


Sa usa ka bahin sa video, makita si Bea nga naghuyop sa mga kandila sa iyang birthday cake samtang gigunitan kini ni Vincent. Nakuha usab sa video ang natural nga mga higayon sa magtiayon, lakip ang ilang paggawas sa lugar diin makita si Bea nga naggunit sa bukton ni Vincent.


Niaging tuig, mikaylap usab ang susamang mga hungihong human mag-viral ang litrato ni Bea ug Vincent. Sa litrato gikan sa birthday party nga giandam sa iyang mga kawani, adunay mga netizen nga nagtuong buntis siya tungod kay daw gitabonan niya ang iyang tiyan gamit ang usa ka pungpong sa mga bulak.


Daling gipanghimakak ni Bea ang mga hungihong pinaagi sa Instagram, diin giklaro niyang dili siya buntis. “For anyone curious about 'the picture' — just caught at a bad angle after an amazing dinner. Glowing, not expecting,” matod niya niadtong panahona.


Hangtod sa pagsulat niini nga balita, wala pa magpagawas og pahayag si Bea bahin sa pinakabag-ong mga hungihong nga buntis siya.


Gikumpirma ni Bea ang iyang relasyon kang Vincent niadtong Agosto sa miaging tuig. Ang magtiayon sa ulahi naminyo sa usa ka pribadong civil wedding nga gipangunahan ni Makati Mayor Nancy Binay niadtong Hulyo 13.


-

bottom of page