‘Stranger Things’ prequel nga ‘Other Worlds’, ipasalida sa 2028
Gipalapdan sa Netflix ang kalibotan sa “Stranger Things” pinaagi sa bag-ong live-action prequel series nga “Other Worlds: A Stranger Things Adventure,” nga gikatakdang ipasalida sa 2028.
Sandra Samala Salem / Paraluman News; Gihubad ni Herli Mae Virador / Ato Ni Bai
November 8, 2026 at 10:55:18 AM
Ang umaabot nga serye, nga nahitabo sa dekada 1950, maghisgot sa mga panghitabo sa wala pa ang orihinal nga show ug ang stage production nga “Stranger Things: The First Shadow,” nga nagsaysay sa masamok nga kagahapon ni Henry Creel sa Hawkins, Indiana, niadtong 1959.
Screengrab gikan sa teaser sa Netflix alang sa “Other Worlds: A Stranger Things Adventure.”
Gipalapdan sa Netflix ang kalibotan sa “Stranger Things” pinaagi sa bag-ong live-action prequel series nga “Other Worlds: A Stranger Things Adventure,” nga gikatakdang ipasalida sa 2028.
Gipahibalo sa streaming platform ang maong proyekto niadtong Nobyembre 6, dungan sa pagsaulog sa Stranger Things Day, usa ka tinuig nga selebrasyon nga naghinumdom sa pagkawala sa karakter nga si Will Byers sa istorya sa serye.
Mahitabo ang istorya sa bag-ong serye sa dekada 1950 ug magpakita sa mga panghitabo sa wala pa ang orihinal nga “Stranger Things” ug ang stage production nga “Stranger Things: The First Shadow,” nga nagsaysay sa lisod nga kagahapon ni Henry Creel sa Hawkins, Indiana, niadtong 1959.
Dili sama sa orihinal nga serye nga nagpunting sa grupo sa mga managhigala nga nag-imbestiga sa misteryosong mga panghitabo sa Hawkins, ang “Other Worlds” magpakilala og bag-ong lugar, mga karakter, mga bayani, ug mga kontrabida. Wala pa magpagawas ang Netflix og dugang detalye bahin sa istorya niini.
Ang managsoong Matt ug Ross Duffer, nga nailhan isip Duffer Brothers ug mga naghimo sa orihinal nga serye, maoy nagpalambo sa prequel kauban ang dugay nang manunulat sa “Stranger Things” nga si Kate Trefry. Si Trefry magsilbing co-creator, manunulat, ug showrunner sa bag-ong serye. Gikatakdang himuon ang produksiyon sa New Mexico.
Si filmmaker Joe Wright, nga nailhan sa pagdirehe sa “Pride & Prejudice,” “Atonement,” ug “Darkest Hour,” maoy modirehe sa unang tulo ka episode ug magsilbi usab nga executive producer kauban ni Trefry.
Sa usa ka pahayag nga gipagawas pinaagi sa Tudum sa Netflix, gihulagway sa Duffer Brothers ang maong proyekto isip bag-ong dugang sa “Stranger Things” franchise, nga adunay lahi nga lugar ug hingpit nga bag-ong mga karakter.
“Stranger Things gihapon kini, apan mas makapahinam tungod kay bag-o ang lugar, mga bayani, ug mga kontrabida,” matod nila.
Wala pa ipahibalo sa Netflix ang mga aktor nga modala sa mga karakter sa “Other Worlds: A Stranger Things Adventure.”
Ang maong prequel usa sa mga bag-ong dugang sa nagkadaghan nga mga salida nga may kalabotan sa “Stranger Things,” lakip ang animated nga serye nga “Stranger Things: Tales From ’85” ug ang dulang ipasundayag sa entablado nga “Stranger Things: The First Shadow.”
-Sandra Samala Salem / Paraluman News; Gihubad ni Herli Mae Virador / Ato Ni Bai
%20(100%20x%20100%20px).png)
