VP Trial: Prosecution mipunting sa posibleng paglapas sa privacy sa presentasyon sa depensa

Gipunting sa House prosecution niadtong Biyernes ang posibleng paglapas sa privacy human gipakita sa publiko sa kampo ni Vice President Sara Duterte ang mga ngalan sa mga opisyal sa Bureau of Internal Revenue (BIR) atol sa cross-examination sa iyang impeachment trial sa Senado.

Gipataas ni House prosecution counsel Erwin Matib ang maong isyu human nagpahayag og kabalaka si Anne Loraine Garcia-Marquez, chief of staff ni BIR Commissioner Charlito Martin Mendoza, sa pagpakita sa mga ngalan sa revenue officers nga nalakip sa Letters of Authority (LOAs) nga gipresentar ni defense lawyer Kristine Ferrer.

“We manifest, Your Honor, that there has been a violation of the privacy of the people involved, Your Honor. Their names were flashed on the screen for everyone to see,” matod ni Matib.

Una nang gipahibalo ni Garcia-Marquez sa impeachment court ang maong pagbutyag, nga matod niya, angay untang gitabonan ang mga ngalan sa mga opisyal.

“Napakita po kasi ’yung name ng mga revenue officers (The name of the revenue officers were shown). It should have been redacted,” matod niya.

Gipasalig ni presiding officer Sen. Francis “Chiz” Escudero nga tangtangon ang mga ngalan sa mga dokumentong isumite ngadto sa impeachment court. “We will redact it in the document that will be submitted to the court,” matod ni Escudero.

“But it was already flashed on the screen. ’Yung concern ko din (My concern also), Your Honor, is the names,” tubag ni Garcia-Marquez.

Matod ni Escudero, susihon sa korte ang maong isyu ug mokonsulta kang Garcia-Marquez sa dili pa siya tugotang mobiya isip testigo. Nahitabo ang maong panaghisgot human unang gikuwestiyon ni Matib ang desisyon sa kampo sa depensa nga ipakita sa publiko ang mga kompidensiyal nga dokumento sa tax audit samtang gikuwestiyon niini ang awtoridad sa BIR sa paghatag og tax records ngadto sa impeachment court.

“We put on record that it was the defense who put on the screen these LOAs, which according to them are supposed to be confidential,” matod ni Matib.

Gipasiugda ni Ferrer nga adunay katungod si Duterte sa pagtugot nga ipagawas ang iyang kaugalingong impormasyon sa buhis. Ang duha ka LOA, nga parehong gipetsahan og Abril 29, 2026, nagtugot sa pagsusi sa tax records ni Duterte gikan 2006 hangtod 2025 ug sa iyang bana nga abogado nga si Manases “Mans” Carpio gikan 2014 hangtod 2025.

VP Sara ug bana gipailalom sa komprehensibong tax audit sa BIR

Gikumpirma ni Garcia-Marquez ang duha ka LOA. Ang LOA alang sa Bise Presidente adunay ulohan nga “Full examination of books of accounts and other accounting records” ug naglangkob sa “all internal revenue taxes for the period from 01/01/2006 to 21/31/2025 pursuant to RATE (Run After Tax Evaders) Program.”

Ang LOA nga giisyu alang kang Carpio adunay parehas nga ulohan ug sakop nga tanang internal revenue taxes, apan mas mubo ang panahon nga gilakip niini, “from 01/01/2014 to 12/31/2025 pursuant to RATE Program.”

“It is requested that all required documents, books and records be provided to the revenue officer(s) to expedite the tax examination,” sumala sa duha ka LOA.

Nadawat sa Carpio Lawyers ang mga LOA niadtong Mayo 29, nga lagmit mao ang law office sa bana sa Bise Presidente.

Matod ni Ferrer, ubos sa revenue regulations, balido ang usa ka LOA sulod sa 180 ka adlaw.

Nagpasabot kini nga matapos ang awtoridad sa pagsusi sa buhis sa ikatulong semana sa Nobyembre karong tuiga, matod ni Ferrer, nga gikumpirma usab ni Marquez.

Gipangutana ni Ferrer si Marquez kon aduna ba siyay nahibaloan nga preliminary assessment report o letter of demand nga giisyu ngadto sa magtiayong Duterte-Carpio kalabot sa tax audit.

Mitubag si Marquez nga nahibalo siya sa dagan sa pagsusi sa buhis apan dili niya mahimong ibutyag ang bisan unsang detalye niini tungod kay gidili kini ubos sa Revenue Memorandum Circular 28-2006, “from the time na-issue po ang LOA (the LOA was issued) up to collection.”

Ang maong mga rekord kabahin sa ebidensiya sa prosecution kalabot sa giingong unexplained wealth ni Duterte. Atol sa hearing niadtong Huwebes, gipresentar ni Garcia-Marquez ang mga rekord sa BIR nga nagpakita nga si Duterte ug Carpio nagdeklarar og hiniusang net income human makuha ang buhis nga PHP85.34 milyon gikan 2007 hangtod 2025.

Gikuwestiyon sa prosecution ang maong kita kon itandi sa gideklarar nga net worth ni Duterte nga PHP98.66 milyon sa iyang 2025 Statement of Assets, Liabilities and Net Worth, apan gisupak sa kampo sa depensa ang maong pagtandi.

-Ato ni Bai