VP spokesperson: Pag-usab sa impeachment voting requirement supak sa 1987 Constitution

Misupak si Atty. Salvador Paolo Panelo Jr., spokesperson ni Vice President Sara Duterte, sa lakang nga ipaubos ang gidaghanon sa mga boto nga gikinahanglan aron makonbikto ang Bise Presidente. Gipasidan-an niya nga ang pag-usab sa basihan sa botohan makalapas sa 1987 Constitution.

Nagpagawas og pahayag si Panelo, anak ni kanhi Presidential Spokesperson Atty. Salvador Panelo Sr., niadtong Miyerkules sa wala pa magdesisyon ang Senado sa eksaktong pamaagi sa pagkuwenta sa mga boto nga gikinahanglan aron makonbikto ang Bise Presidente.

“Pagbabago po ’yun ng Konstitusyon (That is a change to the Constitution),” gipasiugda ni Panelo sa dihang gipangutana siya sa media bahin sa mga lakang nga usbon ang basihan sa gikinahanglang boto. “The Constitution is clear that the two-thirds that is required is two-thirds of all members.”

Gipasiugda niya nga ang mga senador nga sila Ronald “Bato” dela Rosa, Rodante Marcoleta, ug Jose “Jinggoy” Estrada, ingon man si Sen. Loren Legarda, nagpabilin nga mga napiling miyembro sa Senado bisan pa sa ilang pagkabilanggo o pagkawala sa mga proceedings.

“Dapat all members of 24, which means 16,” matod ni Panelo.

Ang Katuyoan sa Konstitusyon

Gipasabot ni Panelo nga tinuyong gipili sa mga naghimo sa 1987 Constitution ang mga pulong nga “two-thirds of all members” imbes nga limitahan ang ihap sa mga senador nga mitambong lamang sa botohan. Kini nga kalainan una nang gipasiugda ni Sen. Pia Cayetano ug defense attorney Michael Poa.

“For the Vice President, who was elected by 32 million people, you really need a supermajority so that it would not be a thin majority that is needed to remove a high official,” matod ni Panelo.

Gikuwestiyon usab ni Panelo nganong wala una maghimo ang Senado og mga lagda alang sa electronic voting o remote attendance sa wala pa hisgoti ang pag-usab sa gikinahanglang gidaghanon sa mga boto.

Matod niya, kon tinuod nga tumong sa Senado ang paghatag og patas nga kahigayonan sa pag-apil sa mga senador nga dili personal nga makatambong, angay unta nga giusab una niini ang mga lagda aron tugotan ang pag-apil pinaagi sa videoconferencing.

“Kung ang habol talaga nila is sagot doon sa tanong na dapat bang patas ba o makatarungan ba na makakaboto ang isang senador na wala sa Senado... e di sana gumawa muna sila ng hakbang para makaparticipate ’yung mga wala rito,” dugang niya.

Gipangutana usab ni Panelo kon ang pag-usab sa gidaghanon sa mga boto nga gikinahanglan aron makonbikto ang Bise Presidente gituyo ba aron masiguro nga matangtang si Duterte sa iyang katungdanan sa wala pa ang sunod nga presidential election.

Gisalikway usab niya ang mga alegasyon nga ang pagkawala sa pipila ka senador kabahin sa estratehiya sa depensa aron mapugos ang pag-absuwelto kang Duterte tungod sa kakulang sa quorum.

“Hindi ito strategic absence to manipulate the vote," matod niya.

Posibleng Epekto sa Umaabot nga Pag-usab sa Konstitusyon

Gawas sa impeachment trial sa Bise Presidente, gipasidan-an ni Panelo nga ang pag-usab sa kahulogan sa “all members” mahimong magtakda og legal nga basihan nga posibleng makaapekto sa umaabot nga mga proseso sa pag-usab sa Konstitusyon.

Lakip niini ang Constituent Assembly, nga nagkinahanglan og three-fourths vote sa tanang miyembro, ug ang Constitutional Convention, nga nagkinahanglan og two-thirds vote.

Gihisgotan usab ni Panelo ang miaging botohan bahin sa mosyon ni Sen. Alan Peter Cayetano, diin 13 lamang ka senador ang mibotar pabor sa pagpadayon sa pag-usab sa voting requirement.

Matod ni Panelo, nagpakita kini nga dili makuha sa prosekusyon ang orihinal nga 16 ka boto nga gikinahanglan aron makonbikto ang Bise Presidente.

Gibalihon sa Senado ang Miaging Ruling

Bisan pa sa pagsupak sa depensa, opisyal nga gibalihon sa Senate impeachment court ang ruling niini niadtong Hulyo 6 pinaagi sa botohan niadtong Miyerkules sa hapon, nga nagtangtang sa pirming requirement nga 16 ka boto.

Napulog tulo ka senator-judges ang mibotar pabor sa pagbalihon sa ruling:

Senate President Sherwin Gatchalian

Senator Vicente Sotto III

Senator Juan Miguel Zubiri

Senator Bam Aquino

Senator JV Ejercito

Senator Risa Hontiveros

Senator Lito Lapid

Senator Panfilo Lacson

Senator Francis Pangilinan

Senator Mark Villar

Senator Raffy Tulfo

Senator Erwin Tulfo

Senator Joel Villanueva

Mibotar batok sa mosyon si Sen. Francis “Chiz” Escudero, samtang unom ka senator-judges ang wala mibotar o wala miapil. Sila mao sila Sen. Alan Peter Cayetano, Sen. Pia Cayetano, Sen. Christopher “Bong” Go, Sen. Imee Marcos, Sen. Camille Villar, ug Sen. Robin Padilla.

Ubos sa bag-ong giaprobahang lagda, ang probisyon sa Konstitusyon nga “two-thirds of all members” maglakip lamang sa mga senador nga legal ug aktuwal nga makahimo sa pag-apil sa impeachment trial sa panahon sa kataposang botohan.

-Ato ni Bai