VP Sara Duterte: Pagbawi sa mga Akusasyon Nagpakita nga Walay Ebidensya

Gipasiugda ni Vice President Sara Duterte nga ang desisyon sa prosekusyon nga bawion ang bribery charge batok kaniya nagpamatuod, matod niya, nga walay lig-ong ebidensya ang impeachment case.

Sa iyang pakighinabi sa mga tigbalita niadtong Martes, Oktubre 13, 2026, gibalik ni Duterte ang iyang baroganan nga sukad pa sa sinugdanan, walay basehan ang mga akusasyon batok kaniya.

“Yung pag-drop ng bribery charge sa impeachment, ito 'yung sinasabi namin sa simula pa lang... na walang ebidensiya lahat ng kanilang akusasyon,” matod ni Duterte, nga nag-akusar sa mga prosecutor nga gigamit ang trial aron daoton ang iyang reputasyon.

Dugang niya, ang maong proseso dili kaayo mahitungod sa pagpapanubag kondili bahin sa padayong paningkamot nga tangtangon siya sa iyang katungdanan.

Gibawi sa House prosecution panel niadtong Biyernes ang Article III, nga nag-akusar kang Duterte nga nanghatag og suhol sa mga opisyal sa Department of Education sa panahon nga siya ang DepEd Secretary gikan 2022 hangtod 2024.

Gipasabot sa ulahi ni Bukidnon Rep. Jonathan Keith Flores nga gihimo ang maong desisyon aron masunod ang ilang gitakdang iskedyul sa trial.

Bisan wala na ilakip ang bribery charge sa Senate impeachment trial, gipahibalo sa mga prosecutor niadtong Sabado nga posible gihapon nilang iduso ang maong kaso ngadto sa Department of Justice ug Office of the Ombudsman alang sa criminal prosecution.

Niadtong Martes, giaprobahan sa Senate impeachment court ang hangyo sa prosekusyon nga bawion ang tulo sa upat ka articles of impeachment.

Tungod niini, magpokus na lamang ang trial sa Article II, nga naglakip sa mga alegasyon sa unexplained wealth, kakulang sa hustong pagdeklara sa mga kabtangan, ug wala pagbiya sa mga interes sa negosyo. -Ato ni Bai