VP Sara Duterte midepensa sa iyang abogado batok sa akusasyon nga 'bully'

Gidepensahan ni Vice President Sara Duterte niadtong Miyerkules ang iyang abogado batok sa akusasyon nga usa kini ka "bully," samtang gikuwestiyon usab niya ang giingong politikal nga pagmaniobra nga may kalabotan sa gisugyot nga 2027 national budget.

Sa iyang pahayag niadtong Oktubre 14, gitandi ni Duterte ang kahimtang sa iyang defense team kang David nga nakig-atubang kang Goliath. Matod niya, ang pagtawag sa iyang abogado nga bully usa ka paagi aron daoton ang usa ka abogado nga nanalipod sa iyang kliyente batok sa mas gamhanang pwersa.

“Lorna Kapunan calling a defense counsel a bully is like calling David the aggressor against Goliath,” matod ni Duterte.

Giakusahan sa Bise Presidente ang House prosecution panel nga nanghadlok ug nagpugong sa mga kawani sa Office of the Vice President (OVP), napakyas sa paghatag og igong ebidensiya sa ilang mga alegasyon, ug nagsalig sa impeachment trial sa Senado aron matabonan ang mga kakulangan sa ilang kaso.

“After all that, where is the evidence?” pangutana niya.

Gihisgotan usab ni Duterte ang mga alegasyon sa pagpanghatag og kuwarta ug politikal nga pagmaniobra nga may kalabotan sa 2027 national budget.

Gikuwestiyon niya kon gigamit ba ang pondo sa gobyerno aron impluwensiyahan ang mga senador nga mohukom sa impeachment trial.

“Is the budget being used to serve the Filipino people, or has it become a bargaining chip to pressure senators who will sit as judges and reward those who vote ‘yes’ in the House of Representatives?” matod ni Duterte.

Gipasiugda niya nga walay kalabotan ang iyang legal team sa mga politikal nga transaksiyon. Matod niya, sukad pa niadtong 2023 nangandam na ang iyang mga abogado alang sa impeachment case, bisan pa og nakulang sila sa tulog, panahon alang sa pamilya, ug kalinaw sa hunahuna.

Gihulagway ni Duterte ang impeachment proceedings nga “political theater disguised as accountability,” ug mipahimangno nga ang katawhan ang mag-antos kon gamiton ang badyet sa gobyerno ug ang proseso sa impeachment alang sa politikal nga pagpadayon sa gahum.

“A defense counsel does not become a bully simply because she refuses to let your accusations go unchallenged,” dugang niya, samtang nanawagan og “evidence, not arrogance; genuine accountability, not political persecution.” -Ato ni Bai