VP Sara Duterte Miakusar sa Prosekusyon nga Nag-imbento og Ebidensya

Gipasanginlan ni Vice President Sara Duterte niadtong Lunes ang prosekusyon sa iyang impeachment trial nga nag-imbento kuno og ebidensya batok kaniya, samtang matod niya, nagkahuyang na ang kaso batok kaniya ug sa iyang bana nga si Atty. Manases “Mans” Carpio samtang gisusi ang mga ebidensya.

Gihimo ni Duterte ang maong pahayag human mitestigo sa miaging semana ang usa ka forensic financial analyst nga miingong nakatigom ang magtiayon og kapin ₱817 milyon nga wala mapatin-aw nga bahandi ug wala gideklarar nga mga kabtangan gikan 2022 hangtod 2025.

Dugang pa, mitestigo ang usa ka saksi gikan sa Anti-Money Laundering Council (AMLC) nga nakadawat og ₱319 milyon nga remittances gikan sa China ug Hong Kong ang Cale88 Foods Corporation, usa ka kompanyang nalambigit kang Carpio. Sa mas lapad nga rekord sa AMLC nga gipresentar sa korte, gipakita nga adunay mga ₱4.4 bilyon nga misulod ug migawas sa mga bank account ni Carpio gikan 2007 hangtod 2025.

Gisalikway ni Duterte ang mga alegasyon ug miingong naggamit na og desperadong mga pamaagi ang prosekusyon tungod kay nagkahuyang na ang ilang kaso.

“Bumabagsak na ’yung kaso nila kaya binibilisan, kasi wala na silang masabi. Nag-iimbento ka ng ebidensya eh. Sa simula pa lang, ’yung impeachment complaint mo walang annexes, walang attached pieces of evidence,” matod ni Duterte sa mga reporter.

“Tapos gumawa ka, nag-imbento ka ng ebidensya. Sinubukan nila ’yun kay Madriaga. Bumagsak na ’yung bribery. Ngayon, sinubukan nila ’yung Grasioso. Wala na eh, bumagsak na,” dugang niya.

Gisupak usab sa defense team ni Duterte ang mga alegasyon sa prosekusyon, nga nag-ingong walay ebidensya nga direktang nagkonektar sa kuwarta sa mga account sa magtiayon ngadto sa gobyerno sa China.

Matod sa iyang mga abogado, wala mapamatud-i sa mga rekord sa AMLC nga ang gobyerno sa China maoy nagpadala og kuwarta ngadto sa Cale88. Gipasabot usab nila nga ang ordinaryong mga transaksyon sa kuwarta dili awtomatikong ebidensya sa ilegal nga kalihokan o pagdawat og kickback.

Gikuwestiyon usab sa Bise Presidente kung naningkamot ba ang prosekusyon nga daoton ang mga lehitimong negosyo nga adunay koneksyon sa China.

“So ano ba talaga? Bawal ba talaga ang negosyo with China kasi it is a national security risk?” pangutana ni Duterte, nga nagkuwestiyon kung giisip na bang hulga sa seguridad ang ordinaryong pagnegosyo sa China.

Giingon ni Duterte nga ang impeachment trial usa ka lakang nga gimaneho sa politika aron babagan ang iyang mga plano sa umaabot.

“Lahat na ay ginagawa ko kuno at lahat din ay gagawin din nila para pabagsakin ako because this is about the 2028 elections,” matod niya. -Ato ni Bai