VP Sara Duterte Dili Mapugos sa Pag-angkon nga Iya ang mga Bank Account — Impeachment Court

Midesisyon niadtong Martes ang Senate impeachment court nga dili mapugos si Vice President Sara Duterte sa pag-angkon nga iya ang mga bank account nga gisumite isip ebidensya sa iyang impeachment trial, tungod sa iyang katungod ubos sa Konstitusyon batok sa self-incrimination.

Gipagawas ni Presiding Officer Francis “Chiz” Escudero ang desisyon bisan pa og gibawi na sa House prosecution panel niadtong Lunes ang orihinal nilang request for admission. Hinuon, gihangyo sa prosecution ang defense nga magkauyon sa pipila ka stipulations kabahin sa pagkatinuod sa mga dokumento.

“The impeachment court, therefore, rules that respondent cannot be required to serve a written response to the request for admission,” matod ni Escudero.

Naglangkob og 104 ka butang ang unang request kabahin sa personal nga impormasyon ni Duterte, iyang kanhing mga katungdanan sa gobyerno, mga interes sa negosyo sa iyang bana, ug nagkalainlaing rekord sa panalapi. Misupak ang defense team ni Duterte sa filing ug gihangyo ang korte nga tangtangon kini sa rekord, apan midesisyon si Escudero nga bisan dili kini kinahanglan tubagon—ug walay awtomatikong pag-angkon nga mahitabo tungod sa iyang dili pagtubag—magpabilin kini sa rekord apan walay evidentiary o prejudicial weight.

Nakasentro ang desisyon sa utlanan tali sa mga lagda sa civil procedure ug sa sukaranang mga katungod ubos sa Konstitusyon. Midesisyon ang korte nga ang Rule 26 sa Rules of Civil Procedure—nga nagtugot sa mga partido sa paghangyo og admissions kabahin sa mga kamatuoran o dokumento—dili mahimong molabaw sa Section 17, Article III sa Konstitusyon, nga naggarantiya nga walay tawo nga mapugos nga mahimong saksi batok sa iyang kaugalingon.

Gipasiugda ni Escudero nga ang pagpugos sa usa ka respondent sa paghatag og sinumpaang tubag ubos sa Rule 26 mahimong magbutang kaniya sa posibilidad nga manubag sa perjury, nga usa ka matang sa legal nga pagpugos. Gisalikway usab niya ang argumento nga dili magamit kini nga mga panalipod sa impeachment tungod kay dili kini hingpit nga criminal trial.

“While the impeachment court welcomes the prosecution’s desire to narrow the issues for trial… any such measure to expedite the proceedings must always yield to the protection of the substantial rights of the respondent under the Constitution,” matod ni Escudero, nga mipasiugda nga ang discovery procedures dili mahimong ipuli sa competent evidence. “The prosecution cannot shift its burden of proof to the respondent through the simple expedience of a request for admission.”

Nagpadayon ang trial ubos sa ikaduhang article of impeachment, nga nakasentro sa mga alegasyon sa unexplained wealth, wala pag-divest sa mga interes sa negosyo, ug kapakyasan sa hingpit nga pagdeklarar sa mga kabtangan ug utang sa Statement of Assets, Liabilities, and Net Worth (SALN) ni Duterte. -Ato ni Bai