VP Duterte Wealth Trial Posibleng Mosunod sa Disclosure Path nila Erap ug Corona

Gilauman nga sundon sa Senate impeachment court ang pamaagi nga gigamit sa impeachment trials ni former president Joseph Estrada ug late chief justice Renato Corona sa pagdumala sa disclosure sa financial information ni Vice President Sara Duterte, matod ni court spokesperson Reginald Tongol niadtong Lunes.

Matod ni Tongol, mahimong ipadayag ang financial information kon kini may kalabotan sa legal claims sa House prosecution panel ubos sa Article II, nga nag-akusar kang Duterte og unexplained wealth, dili tukmang asset declarations ug gidiling business interests.

“Ganun din yung makikita natin na tatahaking track naman ngayon dito sa impeachment ng respondent,” matod ni Tongol sa usa ka televised interview.

Gitubag niya ang mga pangutana kon unsaon sa korte pagbalanse sa pagpresentar sa bank transactions uban sa data privacy, bank secrecy ug mga restriction sa Anti-Money Laundering Council.

Matod ni Tongol, adunay susamang financial disclosures nga nahimong kabahin sa impeachment proceedings nila Estrada ug Corona.

Atol sa trial ni Estrada, mitestigo si Equitable PCI Bank executive Clarissa Ocampo bahin sa bank records bisan wala siya ma-subpoena. Ang maong precedent sa ulahi gigamit atol sa Corona proceedings sa mga diskusyon bahin sa gitugot nga disclosure sa bank information sa impeachment cases.

Sa Corona trial, nag-isyu ang Senate impeachment court og subpoenas alang sa piho nga bank records ug sa ulahi gidawat ang banking evidence kalabot sa Article II nga naglakip sa iyang Statement of Assets, Liabilities and Net Worth (SALN).

Gitugotan usab sa kasamtangang impeachment court ang subpoenas alang sa piho nga bank, tax ug AMLC records nga naglakip kang Duterte, iyang bana nga si Manases Carpio ug pipila ka entities, human magdesisyon nga ang mga dokumento prima facie relevant ug material sa unexplained wealth allegations.

Kapin sa 1,800 ka bank, insurance ug uban pang financial documents ang sunod nga gimarkahan sa prosecution ug defense isip pagpangandam alang sa Article II.

Matod ni Tongol, gilauman nga ang unang mga saksi sa Lunes maoy unang maglatid sa legal framework sa dili pa mas lawom nga hisgutan sa prosecutors ang financial records.

Gilauman nga hisgutan ni retired Sandiganbayan Presiding Justice Amparo Cabotaje-Tang ang mga standard nga gigamit sa pagtino sa unexplained o ill-gotten wealth ug mga pamaagi sa pagtago sa assets, samtang gilauman nga motestigo si Office of the Ombudsman lawyer Karen Batu bahin sa SALN requirements ug records.

Giakusahan sa Article II si Duterte nga nakatigom kuno og bahandi nga dili katimbang sa iyang legal nga kita ug napakyas sa hingpit ug tukmang pagdeklarar sa assets, liabilities ug business interests. -Ato ni Bai