VP Duterte ug bana adunay ₱817.87M nga wala gideklarar nga mga kabtangan ug kita — analyst

Giingong nakaipon og ₱817.87 milyon nga unexplained wealth ug wala gideklarar nga mga kabtangan si Vice President Sara Duterte ug ang iyang bana nga abogado nga si Manases “Mans” Carpio gikan 2022 hangtod 2025, sumala sa usa ka financial forensic analyst nga mitestigo alang sa prosecution atol sa impeachment trial sa Senado niadtong Biyernes.

Gipresentar ni lawyer Alexander Cabrera ang iyang mga nakaplagan sa ika-37 nga adlaw sa trial, diin gitigom niya ang iyang gihulagway nga mga iregularidad sa financial records sa magtiayon alang sa kaso sa House prosecution panel ubos sa Article II sa Articles of Impeachment.

Naglakip ang maong kantidad sa giingong wala gideklarar nga cash, personal ug real properties, ug kita, lakip ang mga kinitaan nga gipasangil sa mga kompanyang Cale88 Foods Corp., Metro City, ug GenCorp.

Matod ni Cabrera, nakuha niya ang kinatibuk-ang kantidad pinaagi sa paggamit sa legal nga prinsipyo nga piercing the corporate veil, nga nagtugot sa mga korte sa pipila ka sitwasyon nga dili ilhon ang bulag nga legal nga personalidad sa usa ka korporasyon aron mapanubag ang mga indibidwal.

Gipasalig niya sa impeachment court nga walay doble nga pag-ihap sa iyang mga kalkulasyon human siya pangutan-a kon adunay mga kantidad nga naihap og balik.

"Ang amin pong method na ginamit po dito ay very conservative. 'Yun 'yung aming inalagaan, na walang double counting, wala pong duplication ng count," matod ni Cabrera.

Base sa tabulation ni Cabrera, ang giingong unexplained wealth ug wala gideklarar nga mga kabtangan ug kita sa magtiayon mikabat sa ₱190,628,012 niadtong 2022, ₱167,337,227 niadtong 2023, ₱264,217,123 niadtong 2024, ug ₱195,692,505 niadtong 2025.

Gihisgotan usab ni Cabrera ang kaminyoon sa magtiayon niadtong 2007 aron ipatin-aw kon unsaon pagtratar sa ilang mga kabtangan ubos sa balaod.

Matod niya, kon walay prenuptial agreement o judicial decree of separation of property, ang ilang kaminyoon sakop sa absolute community of property regime ubos sa Family Code, diin ang ilang mga kabtangan kasagarang giisip nga hiniusang kabtangan sa magtiayon, gawas sa mga eksepsiyon nga gitakda sa balaod.

Gipresentar sa House prosecution panel ang testimonya ni Cabrera aron tigomon ang mga ebidensiya ug ipakita ang ilang gitawag nga “bigger picture” luyo sa Article II sa impeachment complaint.

Giakusahan sa maong artikulo si Duterte sa pagtigom og unexplained wealth, pagkapakyas sa hingpit ug matinud-anong pagdeklarar sa iyang mga kabtangan, utang, ug net worth sa iyang Statement of Assets, Liabilities and Net Worth (SALN), ug pagkapakyas sa pagbiya sa iyang mga interes sa negosyo sa dihang milingkod siya isip Bise Presidente.

Gipresentar ni House prosecutor ug Akbayan Rep. Jose Manuel “Chel” Diokno si Cabrera isip expert witness. Nakakuha si Cabrera og law degree sa Ateneo Law School niadtong 1994, nakahuman og management training sa Harvard Business School, ug nagtrabaho isip certified public accountant sa wala pa mosulod sa propesyon sa abogasya.

-Ato ni Bai